تورکیا بە دەستپێکردنی پڕۆژەی نەفەس، بە چەند هەنگاوێک لە ڕێگای چاندنی نەمامەوە، شاری هەولێر سەوز دەکات و لە قۆناغی یەکەمیشدا بڕی ١٢ هەزار نەمام لە بەرزاییەکانی کەسنەزان لە ڕۆژهەڵاتی هەولێر دەچێنێت و بڕیارە بە چەند هەنگاوێک بە گشتی بڕی ٤٧ هەزار نەمام لە هەرێم بچێنرێت.
هەڵەمەتەکە بە ئامادەبوونی، وەزیری کشتوکاڵ و سەرچاوەکانی ئاوی ھەرێم، بێگەرد تاڵەبانی، وەزیری پێشووی کشتوکاڵ و ئاژەڵداری تورکیا مەھدی ئەکەر، پارێزگاری ھەولێر، ئومێد خۆشناو، چەندین بەرپرس و کاربەدەستی تر دەستیپێکرد.
لە کۆنگرەیەکی هاوبەشی ڕۆژنامەوانییدا، بێگەرد تاڵەبانی وتی: “ئەم پڕۆژەیە بەرهەمی هەماهەنگی و کارکردنی بەیەکەوەیە لەگەڵ کۆنسوڵخانەی تورکیا لە هەولێر، بە خۆشحاڵییەوە کۆنسوڵی تورکیا لەگەڵ دەستبەکاربوونی لە هەرێم لەگەڵ وەزارەتی کشتوکاڵ پەیوەندییەکی زۆر باشی هەبووە و لەسەر کۆمەڵێک بابەتی گرنگ بەتایبەت لە بواری پەرەپێدانی کەرتی كشتوکاڵ قسەمان کردووە، یەکێک لەو بابەتانە بریتیی بوو لە زیادکردنی ڕووبەری سەوزایی وەک ڕووبەڕووبوونەوەی گۆڕانکارییەکانی ئاو و هەوا، چونکە هەموو وڵاتان لە هەمبەر دانانی پلانی ستراتیژی بۆ ڕووبەڕووبوونەوەی گۆڕانکارییەکە، دەیانەوێت هەماهەنگی یەکتر بکەن”.
مەهدی ئەکەر وتی: “ھەسارەی زەوی رۆژ بە رۆژ گەرمتر دەبێت و ئاو و هەواش گۆڕانکاریی بەسەردا دێت،
لەم ڕێورەسمەدا، ١٢ هەزار نەمام دەچێنین و هیوادارین لە داهاتوودا ئەم شوێنە ببێتە دارستانێكی چڕ،
ئومێد خۆشناو پارێزگاری هەولێر ڕایگەیاند: “بابەتی گۆڕانکاری ئاو و هەوا لەلای هەموو حکوومەتەکان و دامەزراوەکانی دیکەی وڵاتان یەکێکە لە پرسە گرنگەکان، لە هەرێمیش پلانی ستراتیژی دانراوە، هەروەها لێکەوتەکانی گۆڕانکاری ئاو و هەوا لە ناوچەکەی ئێمە بە ڕوونی دیارە کە چەند ساڵێکی وشکەساڵیمان بەڕێکرد و زستانەکەش ئەوەندە بەهێزبوو کە بووە هۆی لافاو، بۆیە ئەم هەماهەنگییەی ئێمە لەگەڵ تورکیا کارێکی گرنگە، لەم پڕۆژەیەشدا لە قۆناغی یەکەم بە ٤٧ هەزار نەمام هاوکاری هەرێم دەبن و سەرەتاش ١٢ هەزار نەمام لە هەولێر دەچێنن”.
دواتر لە هەڵمەتێکدا دەستیان کرد بە چاندنی ژمارەیەک لەو نەمانانەی کە گەیشتبووە هەولێر و بڕیاریشە هەڵمەتەکە لەلایەن تیمەکانی وەزارەتی کشتوکاڵ و سەرچاوەکانی ئاو بەردەوام بێت بۆ چاندنی تەواوی ئەو نەمامانەی کە لە تورکیاوە هێنراوەتە هەولێر.
