نوێنەرێکی مامۆستایانی میلاک سەبارەت بە چوونی مامۆستایان بۆ بەغدا ڕایگەیاند، ڕێگای بەغدا بەرنادەین تا دەگەین بە مافەکانمان و لایەنی کەمتەرخەمیش دەگەیەنین بە دادگای هەق.
سادق هەڵەدنی، نوێنەرێکی مامۆستایانی میلاک ڕایگەیاند، “دەچین بۆ بەغدا، بۆ ئەوەی شەق لە مامۆستا و کەلە سەری خوێندکار هەڵنەدرێت، لەسەر داواکردنی مافە ڕاواکانمان، ڕێگای بەغدا بەرنادەین تا دەگەین بە مافەکانمان و لایەنی کەمتەرخەمیش دەگەیەنین بە دادگای هەق”.
ئاماژەی بەوەشکرد، ” ماوەی ١٠ ساڵە سەدان خۆپیشاندان و گردبوونەوە و ناڕەزایەتی مەدەنیانەمان ئەنجامداوە و حکومەت گوێی بۆ نەگرتین، دەیان بەیاننامە و یاداشتمان خستتە بەردەستی دەسەڵاتداران، لە دەرگای هەموو لایەنێکی پەیوەندیدارمانداوە، بەڵام هەر گوێیان نەگرت”.
سادق هەڵەدنی ئەوەشی خستەڕوو، “لە جیاتی پەرۆشی و خەمخۆری و بەدەنگەوە هاتن بە گولە و شەق وەڵاممان درایەوە، بە زۆر مامۆستا و خوێندکارتان ڕاپێچی دەوامی زۆرەملێ و بێ مووچەیی کرد”.
