ڕێکخراوی تەندروستی جیهانی هۆشداری دەدات لەوەی گۆڕاوێکی کۆرۆنا لە سەرانسەری جیهاندا بڵاودەبێتەوە، كە تا ئێستاش هەڕەشە بۆ سەر مرۆڤایەتی.
بەپێی ڕاپۆرتی دامەزراوە تەندروستییەكان، لە ئێستادا 3 جۆری نوێی گۆڕاوی كۆرۆنا (XBB.1.5 و XXB.1.16 و EG.5) هەن، كە جێگەی مەترسین و 6 جۆری دیكەش هەن، كە لە ژێر چاودێریدان، بەبێ ئەوەی بگەنە ئاستی نیگەرانی، بەڵام یەکێک لەو 6 گۆڕاوە (BA.2.86) گەیشتۆتە بەرزترین ئاست لە مەترسییەكاندا.
ڕێکخراوی تەندروستی جیهانی ڕایگەیاندووە، ڤایرۆسی کۆڤید-19 وەک جۆرێکی نوێی ڤایرۆسی کۆرۆنا کە دەبێتە هۆی بڵاوبوونەوەی پەتای کۆرۆنا بەشێوەیەکی بەردەوام لە سەرانسەری جیهاندا وەک مەترسییەک ماوەتەوە.
ماریا ڤان کێرخۆڤ، پسپۆڕی ڕێکخراوی تەندروستی جیهانی ڕایگەیاند، ڤایرۆسی سارس-کۆڤ-٢ لە ئێستادا لە هەموو وڵاتێکدا بڵاودەبێتەوە و هێشتا مەترسی دروست دەکات و وتیشی، “دەبێت وریا بین، چونکە ڤایرۆسەکە بڵاودەبێتەوە و پەرەدەسێنێت و لە گۆڕاندایە”.
ڤان کێرخۆڤ لە سەردەمی پەتای كۆرۆنای ساڵی 2019دا بەڕێوەبەری تەکنیکی ڕێکخراوی تەندروستی جیهانی بۆ کۆڤید-19 بووە، ئێستاش بە وەکالەت بەڕێوەبەری دەزگای نەتەوە یەکگرتووەکانە بۆ ئامادەکاری و خۆپاراستن لە پەتاکە.
جگە لە تووشبوون و نەخۆشی توند، ڕێکخراوی تەندروستی جیهانی نیگەرانە لە کاریگەرییە درێژخایەنەکانی ڤایرۆسەکە، کە بە حاڵەتە درێژخایەنەکانی كۆڤید یان دوای كۆڤید ناسراوە.
ڤان کێرخۆڤ پشتڕاستی کردەوە: “بەڵگەمان هەیە، کە کوتان بە ڤاکسینی کۆڤید-19 لە ڕاستیدا مەترسی تووشبوون بە حاڵەتەکانی دوای کۆڤید کەم دەکاتەوە و 13.5 ملیار ڤاکسین دژی کۆڤید-19 لەسەر ئاستی جیهان بەکارهێنراوە”.
وتیشی، “خەڵک دەتوانن لە هەمان کاتدا تووشی ئەنفلۆنزا و سارس-کۆڤ-٢ ببن، بۆیە داوا لە خەڵکی نیوەگۆی باکووری زەوی دەكەم لەگەڵ نزیکبوونەوەی زستاندا کوتانی دژی هەردووکیان بەكاربهێنن”.
