نەخۆشخانەی هیوا لە سلێمانی ئاماری ڕۆژێكی تووشبووانی شێرپەنجە بڵاودەكاتەوە و ڕایدەگەیەنێت، كە ٢٦٤ نەخۆش كیمیاییان وەرگرتووە.
نەخۆشخانەی هیوا لە ڕاگەیەنراوێكدا ئاماژەی بەوەكردووە، سەرەڕای ئەو هەموو گرفتە داراییانەی، كە هەیە، بەڵام هێشتا توانیومانە خزمەتگوزاریەكان لە ئاستێكی باڵادا بێت و هیوادارین ئەم خزمەتانە بەردەوام بێت و پشتیوانی هەموو لایەك هەبێت و گرفتە داراسیەكان نەبێتە هۆی لاوازبوونی خزمەتگوزاریەكانمان لەسەر ئاستی عێراق و ناوچەكە.
سەبارەت بە ئامارەكانی ئەمڕۆ ٢١ی ١١ی ٢٠٢٣، نەخۆشخانەی هیوا ڕوونی كردۆتەوە، ٢٥ نەخۆشی تازە تۆمار كراون و ١١٧٠ نەخۆش سەردانی نەخۆشخانەیان كردوە و ٤٣٢٠ پشكنینی تاقیگەیی جۆراوجۆر بۆ نەخۆش ئەنجام دراوە و ١٦٤ نەخۆش پشكنینی تیشك و سۆنەر و ئیكۆیان بۆ كراوە.
ئاماژەی بەوەشكردووە، ٢٦٤ نەخۆش كیمیاییان وەرگرتوە و هەروەها ٧١٥ نەخۆش چارەسەری پێویستیان وەرگرتووە و ١٠٥ نەخۆش لە بەشی فریاكەوتنی خێرا داغڵ بوون.
ئاشكراشی كردووە، ٤٥٣ نەخۆش لە قاوشە جیاجیاكانی نەخۆشخانە داغڵ كراون و چارەسەری پێویستیان وەرگرتووە.
