ئەمریکا لە سووریا وەڵامی ئێران دەداتەوە و بەرژەوەندییەکانی سوپای پاسداران و میلیشیاکانی بۆردومان دەکات.
ئەمڕۆ پێنجشەممە، فەرماندەیی ناوەندی ئەمریکا ڕایگەیاند، بنکەیەکیان لە سووریا بۆردومان کردووە کە سوپای پاسدارانی ئێران و گروپەکانی، بەکاریان هێناوە.
ڕوونیشیکردەوە کە بۆردومانەکە لە وەڵامی ئەو زنجیرە هێرشەدا دێت کە لە عێراق و سووریا کراونەتە سەر هێزەکانی ئەمریکا.
وەزارەتی بەرگری ئەمریکاش بڵاویکردەوە، هێرشەکە لە ڕێی دوو فڕۆکەی جۆری ئێف 35 ئەنجامدراون و تێیدا کۆگای چەك و تەقەمەنی لە ڕۆژهەڵاتی سووریا کراوەتە ئامانج.
لای خۆشیەوە لوید ئۆستن، وەزیری بەرگری ئەمریکا ڕایگەیاند، جۆ بایدن سەرۆکی ئەمریکا پاراستنی ئەمریکییەکان بە سەرەکیترین کاری لەپێشینەی خۆی دەزانێت و هێرشەکەی ئەمڕۆش بە فەرمی ئەو بووە.
لە دوای دەستپێکردنی هێرشەکانی ئیسرائیل بۆ سەر بزووتنەوەی حەماس لە کەرتی غەززە، میلیشیاکانی سەر بە ئێران ناوبەناو بنکەکانی ئەمریکا لە عێراق و سووریا دەکەنە ئامانج، ئەویش بە پاساوی ئەوەی ویلایەتە یەکگرتووەکان پشتیوانی لە ئیسرائیل دەکات.
