ئەمڕۆ سێشەممە، مامۆستایان و وانەبێژان لەبەردەم پەروەردەی ڕۆژئاوای شاری سلێمانی خۆپیشاندانیان دەستپێکردەوە و بە ڕێپێوان بەرەو دادگای سلێمانی بەڕێکەوتن.
خۆپیشاندانی بەرفراوانی مامۆستایان و وانەبێژان لە کاتێکدایە کە دوینێ مووچەی مانگی ئاب دابەشکرا، بەڵام ئەمڕۆ مامۆستایان، وانەبێژان و فەرمانبەران بە هەمان گڕوتینەوە بەردەوامن لە خۆپیشاندان و ناڕەزایەتی، ناگەڕێنەوە هۆڵەکانی خوێندن.
مامۆستایان و فەرمانبەران ڕاگەیەندراوێکیان بڵاوکردەوە و ئاماژەیان بەوەکرد، “سازش لەسەر ماف و داواکارییەکانمان ناکەین، بەردەوامی بە بایکۆت و ناڕەزایەتییەکانمان دەدەین، جەخت لە جێبەجێکردنی داواکارییەکانمان و چارەسەری ڕیشەیی گرفتەکانمان دەکەینەوە”.
داواکاری مامۆستایان و فەرمانبەران چەند خاڵێک لە خۆدەگرێت، دابەشکردنی مووچە ڕاستەوخۆ لەلایەن وەزارەتی دارایی عێراق، دەستپێکردنەوەی پلەبەرزکردنەوەی مامۆستایان و فەرمانبەران، دامەزراندنی مامۆستایانی وانەبێژ، دابەشکردنی مووچەی مانگی ٩ و ١٠، ڕێککردنەوەی دابەشکردنی مووچە مانگانە لە کاتی خۆیدا هەروەها دیاریکردنی چارەنووسی مووچە پاشەکەوتکراوەکان.
