وەزارەتی خوێندنی باڵا و توێژینەوەی زانستی حكومەتی هەرێم لەسەر وتەكانی مامۆستایەكی زانكۆی سلێمانی، كە “قسەی نەشیاوی” بە كچە ڕۆژنامەنووسێك وتبوو داوای ڕێكاری یاسایی دەكات.
وەزارەتی خوێندنی باڵا و توێژینەوەی زانستی نووسراوێکی بە ژمارە (1437) لە ڕێکەوتی (2023/11/5) بە واژۆی د. ئارام محەمەد، وەزیری خوێندنی باڵا ئاڕاستەی سەرۆکایەتی زانکۆی سلێمانی کردووە، کە تیایدا هاتووە: کاری پێویست ئەنجام بدرێت بە پێکهێنانی لێژنەیەکی تایبەت بۆ بەدواداچوونی وتەکانی ئەو مامۆستایەی زانکۆی سلێمانی، کە لە چاوپێکەوتنێکدا لە تۆڕە کۆمەڵایەتییەکان بڵاوبۆتەوە و وشەی نەشیاوی بەکارهێناوە بەرامبەر خانمێکی ڕۆژنامەنووس دوور لە داب و نەریت و پیشەکەی خۆی.
وەزارەتی خوێندنی باڵا و توێژینەوەی زانستی، زانکۆی سلێمانی ڕاسپاردوە بەزووترین کات دوای تەواوبوونی کاری لێژنەکە لە ئەنجامەکەی ئاگاداریان بکەنەوە.
