بەهۆی کەوتنەوەی ئاگر لە ناوەندێکی چاکسازیی ئالوودەبووانی ماددەی هۆشبەر لە شاری لنگرود لە باکووری ئێران، 32 کەس گیانیان لەدەستدا.
ئاژانسی هەواڵی فەڕمی ئێران IRNA بڵاویکردەوە ، ئەمڕۆ هەینی ئاگر لە ناوەندی چارەسەری ئالوودەبوانی ماددەی هۆشبەر کەوتووەتەوە کە دەکەوێتە شاری لنگرودی سەربە ویلایەتی گەیلان لە کەناری دەریای قەزوین.
ناوەندەکە کە لەلایەن کەرتی تایبەتەوە بەڕێوەدەبرێت، بەهۆی ئەو ڕووداوەوە تیایدا 32 کەس گیانی لەدەستداوە و 16 کەسیش برینداربوون کە برینی چواریان سەختە.
محەممەد جەلایی، جێگری سیاسی و ئەمنی و کۆمەڵایەتی قائیمقامی گەیلان، بڵاوی کردوەتەوە: ئاگرەکە لە کاتژمێر ٥:٤٥ بەیانی ئەمڕۆ لە ناوەندێکی تایبەتی چارەسەرکردنی ئالودەبوان بە ماددەی هۆشبەر لە شاری لەنگرۆد ڕووی داوە و لێکۆڵینەوەش لە هۆکاری کەوتنەوەی ئاگرەکە کراوە.
