ئەمڕۆ قوباد تاڵەبانی جێگری سەرۆکوەزیرانی حکومەتی هەرێم پێشوازیکرد لە کاسی بونکا باڵیۆزی کەنەدا لە عێراق و چەند پرسی جێی بایەخی ھەردوولا گفتوگۆیان لەبارەیەوە کرا.
قوباد تاڵەبانی لە نێو ئەنجومەنی وەزیرانی حکومەتی هەرێم لەگەڵ کاسی بونکا کۆبووەوە و لە کۆبوونەوەکەدا تامی ئەمێس بەڕێوەبەری ئۆفیسی باڵیۆزخانەی کەنەدا لە ھەولێر ئامادەی بوو، بارودۆخی سیاسی و ئابوری عێراق و چۆنییەتی چارەسەرکردنی کێشەکانی نێوان ھەرێم و بەغدا تاوتوێ کران. ھەردوولاش ھیوایان خواست ھەڵبژاردنەکانی ئەنجومەنی پارێزگاکانی عێراق بە شێوەیەکی پاک و بێگەرد و دادپەروەرانە بەڕێوەبچێت.
سەبارەت بە ھەڵبژاردنەکانی داھاتووی پەرلەمانی کوردستانیش، ھەردوولا جەختیان کردەوە لە بەڕێوەچوونی ھەڵبژاردنەکان لەو وادەیەی لەلایەن سەرۆکایەتی ھەرێمەوە دیاری کراوە.
