وەزارەتی پەروەردەی عێراق جەخت دەکاتەوە لە بڕیاری قەدەغەکردنی بەکارهێنانی مۆبایل بۆ تۆمارکردنی وێنەی خوێندکاران لە نێو خوێندنگە و پۆلەکاندا.
ئەمڕۆ پێنجشەممە، کەریم سەید، وتەبێژی وەزارەتی پەروەردەی عیراق ڕایگەیاند، وەزارەتی پەروەردە جەخت دەکاتەوە لەسەر ڕێنمایی بەکارنەهێنانی کامێرای مۆبایل بۆ تۆمارکردنی وێنەی خوێندکاران و بڵاوکردنەوەیان لە تۆڕە کۆمەڵایەتییەکاندا.
ڕوونیشێکردەوە تۆمارکردنی ئەو دیمەنانە و بڵاوکردنەوەیان دەبنە هۆی دروستکردنی فشار و گاڵتەپێکردن و لەکەدارکردنی خوێندکاران.
وتەبێژی وەزارەتی پەروەردەی عێراق جەختیشیکردەوە کە وەزارەتەکە توندترین ڕێکار دەگرێتە بەر بۆ ڕێگرتن لەو حاڵەتانە و لێپچینەوە لەگەڵ سەرپێچیکاران.
