زریانێ بێرنارد سوو ڕۆژە ڕووی لە وڵاتی مەغریب کردووە کە خێراییەکەی دەگاتە ١٠٠ کیلۆمەتر لە کاتژمێرێکدا و بەهۆیەوە سێ کەس گیانیان لەدەستداوە و زیانی ماددی بەچەند ناوچەیەکی جیاوازی ئەو وڵاتە گەیاندووە.
بەهۆی کاریگەری زریانەکەوە گرفتی هاتووچۆ بۆ شۆفێران دروست بووە و لەڕووداوێکی هاتووچۆدا کە لە سەر ڕێگەی خێرای نێوان شاری دار ئەلبەیزا و مەراکیشی پایتەخت ڕوویداوە سێ کەس گیانیان لەدەستدا و چوار کەسی دیکەش بە سەختی برینداربوون.
ئەم زریانە بەهێزە بووە بەهۆی دروستبوونی دیاردەی خۆڵبارین و کەمکردنەوەی سنووری بینین و دروستبوونی ڕووداوی هاتووچۆ لەسەر ڕێگە خێراکاندا.
لەچەند گرتەیەکی ڤیدیۆییدا کە لەتۆڕە کۆمەڵایەتییەکاندا بڵاوکراوەتەوە دەردەکەوێت هۆکاری ڕووداوەکانی هاتووچۆ بەهۆی کەوتنی ستوونەکانی کارەبا و شکان و ڕیشەکێش کردنی دارەکان بووە لەهەندێک لەشەقامەکاندا، ئەوەش گرفتی هاتووچۆی دروست کردووە.
شارەزایەکی کەشناسی مەغریب ئاماژەی بەوەکردووە، ڕادەی بەهێزی و خێرایی زریانەکە لە کەناراوەکانی ئیسپانیا ڕەنگە بگاتە ١٤٠ کیلۆمەتر لە کاتژمێرێکدا و بارانێکی بەهێزی لەگەڵدابێت.
