جێگری سەرۆکی بەرژەوەندییەکانی ڕوسیا لە سوریا ڕایگەیاند، حەوت فڕۆکەی ئیسرائیلی لە ئاسمانی دەریای سپیی ناوەڕاستەوە فڕۆکەخانەی دیمەشق و حەلەبی نێودەوڵەتییان بۆردومان کردووە و پەکیان خستوون.
فادیم کۆلیت جێگری سەرۆکی بەرژەوەندییەکانی ڕوسیا لە کۆنفارنسێکی ڕۆژنامەنووسیدا ڕایگەیاند سێ فڕۆکەی جەنگی ئیسرائیلی لەجۆری ئیف ١٥ و چوار فڕۆکەی دیکە لە جۆری ئێف ١٦ لە دەریای سپی ناوەڕاستەوە هێرشیان کردووەتەسەر فڕۆکەخانەی نیربی نێودەوڵەتی لە حەلەب و فڕۆکەخانەی دیمەشقی نێودەوڵەتی و بۆردومانی کردووە. ئاماژەی بەوەشکردووە، چەند فڕۆکەیەک زیانیان بەرگەوتووە و کارەکانی فڕۆکەخانە پەکیان کەوتووە.
ئەوەش لەکاتێکدایە، دوێنێ ٢٢ی ئۆکتۆبەری ٢٠٢٣ حەوت فڕۆکەی جەنگی ئیسرائیلی لە کاتژمێر پێنج و ٢٢ خولەکەوە هەتا کاتژمێر پێنج و ٣٣ خولەک بۆردومانی ئەو دوو فڕۆکەخانەیەیان لە سوریا کرد.
هاوکات، وەزارەتی گواستنەوە و گەیاندنی سوریا رایگەیاند گەشتەکانیان لەریگەی هەردوو فڕۆکەخانەی نێودەوڵەتی دیمەشق و حەلەبەوە ناکرێت، بەڵکو لەڕێگەی فڕۆکەخانەی لازقییەی نێودەوڵەتییەوە ئەنجام دەدرێت.
