بەرپرسێکی پارێزگای سنە ڕایگەیاند لە ئایندەیەکی نزیکدا گەشتی ئاسمانی نێوان سنە بۆ سلێمانی دەستپێدەکات.
عەلی نوری جێگری سەرۆکی نووسینگەی هەماهەنگی ئابووری پارێزگای سنە ڕایگەیاند، ڕۆژی دووشەممە، گەشتی ئاسمانی نێوان سنە-سلێمانی دەستپێدەکات.
ڕوونیشیکردەوە کە گەشتەکە ترانزێت دەبێت، لە تارانەوە بۆ سنە و پاشان سلێمانی و بە پێچەوانەشەوە.
ئەوەشیخستەڕوو کە دوای وەرگرتنی مۆڵەتی پێویست بۆ دەستپێکردنی گەشتەکانی هێڵی ئاسمانی پۆیا لە دەسەڵاتی فڕۆکەوانی مەدەنی و بەرپرسانی حکومەتی عێراق، یاداشتێکی هاریکاری لە نێوان پارێزگاری کوردستان (سنە) و هێڵی ئاسمانی پۆیا ئیمزا کرا.
عەلی نوری ئاماژەشیدا بەوەی بە دەستپێکردنی گەشتەکە وەبەرهێنەرانی هەرێمی کوردستان دەتوانن بچنە ئێران و کاریگەریشی لەسەر گەشەسەندنی ئابووری پارێزگای سنەش دەبێت.
