ئامارەکان، ئەوە دەخەنە ڕوو کە تورکیا لە ماوەی ١٠ رۆژی بۆردوومانەکانی دا زیاتر لە ٢٥٠ شوێنی لە ڕۆژئاوا بۆردوومان کردووە.
بە گوێرەی ئامارەکانی بەشی چاودێری و بەبەڵگەکردنی پێگەی نۆرس پرێس، تورکیا لەماوەی ١٠ رۆژی رابردوودا ٢٦٤ شوێنیان لە رۆژئاوای کوردستان کردووەتە ئامانج.
بە گوێرەی ئامارەکان شوێنە بەئامانجکراوەکان بەسەر ٢٩ شوێنی ژێرخان و ١٨٥ شوێنی نیشتەجێبوون و ٣٨ شوێنی سەربازیدا دابەشکراون، کە ٢٥یان دەگەڕێنەوە بۆ هێزەکانی حکومەت و ٧ زەوی کشتوکاڵی و ٣ کارگەی پیشەسازی و قوتابخانەیەک و نەخۆشخانەیەکیش بەئامانج کراون.
ئەم شوێنانە بە ٣٥٦ هێرش کراونەتە ئامانج، کە ٢٦٧ هێرشیان بە تۆپ و چەکی قورس، ٢٥یان بە فڕۆکەی سەربازیی و ٦٤یان بە فڕۆکەی بێفڕۆکەوانەوە ئەنجامدراون.
لەماوەی ١٠ رۆژی هێرشەکانی تورکیادا بۆ سەر رۆژئاوای کوردستان، ٩ هاوڵاتی سڤیل شەهید بوون و ١٥ی دیکەش برینداربوون، هەروەها ٣٩ شەڕڤان شەهید بوون و ٣٤ی دیکەش برینداربوون.
