سه‌رۆك وه‌زیرانی ئیسرائیل ڕایدەگەیەنێت، وه‌ڵاممان بۆ هێرشه‌كه‌ی بزوتنه‌وه‌ی حەماس ڕۆژهه‌ڵاتی ناوه‌ڕاست ده‌گۆڕێت.
نوسینگه‌ی سەرۆك وەزیرانی ئیسڕائیل به‌یاننامه‌یه‌كی بڵاوكرده‌وه و ڕایگه‌یاندووە، بنیامین نەتەنیاهۆ له‌گه‌ڵ سه‌رۆك شاره‌وانییه‌كانی ناوچه سنورییه‌كانی باشوری ئیسرائیل و نزیك كه‌رتی غه‌ززه گفتوگۆی كردوه، كه شه‌ممه‌ی ڕابردوو ڕووبه‌ڕووی هێرشی بزووتنه‌وه‌ی حەماسی فه‌له‌ستینی بوونه‌وه.
بنیامین نه‌ته‌نیاهۆ وتویه‌تی: “ئه‌وه‌ی به‌سه‌ر بزووتنه‌وه‌ی حه‌ماسدا هاتووه، زۆر سه‌خت و دژوار ده‌بێت و ئیسرائیل ده‌ستیكردوه به وه‌ڵامدانه‌وه‌ی.
جەختیشی كردۆتەوە، “شه‌ڕه‌كه كاتی ده‌وێت و پێویستمان به هه‌ڵوێستێكی به‌هێزه له‌م چه‌ند ڕۆژه سه‌خته‌ی داهاتوودا”.
دەشڵێت: “ده‌وڵه‌ت هه‌موو شتێك ده‌كات بۆ یارمه‌یتدانتان، داوای خۆڕاگریتان لێده‌كه‌م، چونكه ڕۆژهه‌ڵاتی ناوه‌ڕاست ده‌گۆڕین، له ئامێزتان ده‌گرم و به زه‌بری هێز و هێزێكی زۆر شكستیان پێ ده‌هێنین.”
