د. لەتیف ڕەشید، سەرۆك کۆمار ڕەتیدەکاتەوە، هیچ مەترسییەك لەسەری قەوارەی هەرێمی کوردستان هەبێت و ڕەخنەش لە ئیدارەی ئێستای کەرکووك دەگرێت بەوەی نەیتوانیوە خزمەتگوزاری پێویست پێشکەش بە شارەکە بکات.
سەرۆك کۆمار لە چاوپێکەوتنێکی لەگەڵ کەناڵی عەرەبییە ئەلحەدەسدا لە باسی لە کێشە ناوخۆییەکانی هەرێمی کوردستان کرد و لەو بڕوایەدابوو کە زیادەڕۆیی دەکرێت لە قەبەکردنی ناکۆکییەکانی نێوان پارتی دیموکراتی کوردستان و یەکێتیی نیشتمانیی کوردستان.
ئەوەشی خستەڕوو کە ئێستا پەیوەندییەکانی نێوان هەرێمی کوردستان و حکومەتی فیدراڵی باشە و هەندێكجار گرفت لە ڕێکارەکانی جێبەجێکردنی بڕیارەکان دروست دەبن.
ڕاشیگەیاند عێراق پەیوەندییەکی باش و پتەوی لەگەڵ ئێران و ئەمریکادا هەیە و سەبارەت بە بۆردومان و پێشێلکارییەکانی تورکیاش وتی: “ئێمە وەک وڵاتێکی سەربەخۆ ئەمە قبوڵ ناکەین و پێویستە ئەوانیش وەک وڵاتێکی دراوسێ ڕەچاوی بارودۆخی ئێمە بکەن”.
ئەمەی خوارەوە دەقی چاوپێکەوتنەکەیە:
بینەرانی ئازیزمان ، من ماجید حەمیدم سڵاوتان لێبێت و بەخێر بێن بۆ ئەم دیالۆگە تایبەتە لەگەڵ جەنابی د. لەتیف جەمال رەشید سەرۆک کۆماری عیراق بۆ باسکردنی کۆمەڵە بابەتێک لەسەر پرسەکانی ناوخۆ و دەرەوەی عێراق .
کەناڵی عەرەبيە ئەلحەدەس : پەیوەندی نێوان بەغدا و هەولێر لە ساڵی 2003ەوە بەردەوامە وهەڵبەز ودابەزی زۆری بەخۆیەوە بینیوە، ئەمڕۆ ڕێککەوتنێک لە نێوان بەغدا و هەولێر هەیە، ئەو بنەمایانە چین کە دەبێت هەبن بۆ بەردەوام بونی ئەم پەیوەندییە بەگوێرەی بنەما دەستوورییەکان؟
سەرۆک کۆمار: پێم وایە لە ئێستادا پەیوەندی نێوان هەرێم و حکومەتی فیدراڵی باشە، لە هەندێک ماوەی کورتدا کێشە هەبووە، و پێم وایە ئەوانە کێشەی سیاسی ڕاستەقینە نین، کێشەی فیدراڵی نین، بەڵکو زیاتر کێشە لەسەر هەندێک بابەتی جێبەجێکردن وەک پرسی نەوت، بودجە، و پێدانی مووچەی فەرمانبەرانی هەرێمی کوردستان هەیە ، بەڵام زیاتر لە دە مانگ لەمەوبەر دوای پێکهێنانی حکومەتی نوێ، گفتوگۆ لەسەری لەلایەن هەرێمی کوردستان و حکومەتی فیدراڵیەوە بەردەوامە، پێم وایە زۆربەی کێشەکانی جێبەجێکردن چارەسەر دەکرێن، پەیوەندییەکانی نێوان هەردوولا باشن و لەگەڵ هاتنی شاندەکانی هەرێم بۆ بەغدا و ئاڵوگۆڕی سەردانەکان گفتوگۆ بەردەوامی هەیە، و هیوادارین پەیوەندی و لێکتێگەیشتنەکان زیاتر پتەوتر بکەین .
دەمەوێت ئاماژە بە خاڵێکی گرنگ بکەم، پێموایە زۆربەی کێشە و تێنەگەیشتنەکانی نێوان هەرێم و ناوەند دەرئەنجامی نەبوونی یاسایەکی وردە بۆ بەرهەمهێنان و فرۆشتن و کڕینی نەوت ، تەنها لە هەرێمی کوردستان ئەم کێشەیە نیە بەڵکو لە چەند پارێزگایەکی تریش هەمان کێشە هەیە ، ئێستا حکومەتی فیدراڵی و حکومەتی هەرێم جدین لەدانانی یاسای نەوت و گاز، من باوەڕم وایە دوای پەسەندکردنی یاسای نەوت و گاز و لێکتێگەیشتنی نێوان هەردوولا، کێشەکان بەرەو چارەسەر دەرۆن.
کەناڵی عەرەبيە ئەلحەدەس : جەنابی سەرۆک ڕاپۆرتی ترسناک هەیە لەسەر ئایندەی هەرێمی کوردستان، کەسانێک هەن دەڵێن هەرێم بە یەکگرتوویی نامێنێتەوە، کەسانێک هەن باس لە ترس دەکەن لەسەر سیستەمی فیدراڵی لە عێراق.
سەرۆک کۆمار: پێموایە ئەمانە زیادەڕەوی تیایەو و دەنگۆی ڕاگەیاندنن ، بە گشتی لە عیراقدا بەدەست لێدوانی نابەرپرسانە دەناڵێنین، لە لایەن هەندێک دەزگای ڕاگەیاندن و تۆڕە کۆمەڵایەتییەکانەوە ، پەیوەندی نێوان هەرێم و ناوەند باش و بەهێزە و هەمووان هەوڵ دەدەن بنەمای بەهێز و ڕێسای گرنگ و یاسایی بۆ چارەسەرکردنی کێشەکان دابنێن.
کەناڵی عەرەبيە ئەلحەدەس : کەواتە ئێوە ترستان لەسەر سیستمی فیدراڵی هەرێم نیە ؟
سەرۆک کۆمار: بە هیچ شێوەیەک ترسم لە سیستمی فیدراڵی لە هەرێم نیە، بە پێچەوانەوە دەبێت لەگەڵ حکومەتی فیدراڵی کار بۆ پەرەپێدان و بەهێزکردنی بکەین، بەهێزکردنی سیستمی فیدراڵی لەهەرێم بەهێزکردنی بەهێزکردنی حکومەتی فیدراڵە و بەهێزکردنی هەرێمیشە لە هەمان کاتدا.
کەناڵی عەرەبيە ئەلحەدەس : بەڵام کێشەی ناوخۆیی هەیە لە نێوان هەردوو لایەنی سەرەکیدا لە هەرێم، ڕاپۆرتێکی ئەمریکی پێداگری لەسەر یەکخستنی هێزی پێشمەرگە کردووە بۆ پاڵپشتیکردنی هەرێم، چۆن دەتوانرێت جیاوازیەکانی ناوخۆی هەرێم چارەسەر بکرێت ؟
سەرۆک کۆمار: پێموایە ئەمانەش زیادەڕۆیین، پەیوەندی نێوان هەرێم و ناوەند باشە، بەڵێ هەندێک جیاوازی لە نێوان لایەنە کوردیەکان هەیە، لە نێوان لایەنە عێراقی و نێودەوڵەتییەکانیشدا ئەو جیاوازیانە بوونیان هەیە، ئەگەر جیاوازی نەبێت و ئاڕاستە جیاوازەکان نەبن، ئەوکاتە پێویست بە لایەنی جیاواز و فرەلایەنی ناکات، چەند ڕۆژێک لەمەوبەر کۆنگرەی پێنجەمی یەکێتی نیشتمانی کوردستان گرێدرا ، کە زۆربەی هێزە سیاسییەکانی عێراق تێیدا بەشداربوون، هەروەها پارتی دیموکراتی کوردستانیش بەشداربون، سەرۆک نێچیرڤان بارزانی سەرۆکی هەرێمی کوردستان ئامادەی کۆنگرەکە بوو، وتارەکەی لە کۆنگرەکەدا باش بوو و لەلایەن هەموو لایەکەوە پێشوازی لێکرا.
بەڵێ کێشە لە نێوان حزبەکاندا هەیە، بەڵام لە هەموو جیهاندا ئەو کێشەو جیاوازیانە بونیان هەیە هەندێک جیاوازی نێوان حزبەکان لە ئەوروپا زۆر بەهێزترە لە کێشەکانی نێوان حزبە عێراقییەکان و حزبە کوردییەکان.
کەناڵی عەرەبيە ئەلحەدەس : کەواتە باوەڕتان وایە هەرێم بە یەکگرتوویی دەمێنێتەوە؟
سەرۆک کۆمار: بێگومان … ئەمەش گرنگە بۆ بەهێزکردنی هەرێم و بەهێزکردنی حکوومەتی فیدراڵی و بەهێزکردنی گەلی کورد لە هەرێمی کوردستان.
کەناڵی عەرەبيە ئەلحەدەس : بڕۆین بۆ باسێکی تر، کە دۆسێی کەرکوکە، بەرەو هەڵبژاردنی ناوخۆیی دەڕۆین و بۆ یەکەمجارە دوای ساڵانێک هەڵبژاردن لە کەرکوک ئەنجام دەدرێت، لە چی دەترسیت لە دۆخی کەرکوک؟
سەرۆک کۆمار: یەکەم کەرکوک بە بۆچوونی من گرنگترین شاری عێراقە، بە بەرهەمهێنانی نەوت خزمەتی عێراقی کردووە و یەکەم شار بووە کە دەرهێنانی نەوتی تێدا دەرهێنراوە، خەڵکی کەرکوک نوێنەرایەتی گەلی عێراق بە گشتی دەکەن لە ڕووی مەزهەب و پێکهاتەکانەوە، بۆیە کەرکوک بۆ عێراق شارێکی زۆر گرنگە، و هەمووان یەکڕیزی کەرکوک دەپارێزن و کێشەکان لەناوخۆی کەرکوک چارەسەر دەکەن.
پێم وایە قسەکردن لەسەر ترسەکانی کەرکوک زیادەڕەوی تێدا دەکرێت، بەڵێ هەندێک جار ئیدارەی شاری کەرکوک باش نەبووە، بەڵام دوای پێکهێنانی لیژنەکانی پارێزگاکان و هەڵبژاردنە ناوخۆییەکانی داهاتوو، ئەو کێشانە چارەسەر دەبن، ئەرکی هەموو لایەکیشە هانی هەڵبژاردنێکی ئازاد و پاک بدەن بۆ پێکهێنانی ئیدارەیەکی باش بۆ خزمەتکردنی خەڵکی کەرکوک
کەناڵی عەرەبيە ئەلحەدەس : ئێمە باس لە سێ نەتەوە دەکەین کە ئەگەر بڵێین لە کەرکووک دژ بەیەکن، ئەگەر هەڵبژاردن بکرێت و هەندێک بە ئەنجامەکان ڕازی نەبن، دەگاتە بەریەککەوتن ؟
سەرۆک کۆمار: بەبروای من ناگاتە ئەوەی کە بگەنە پێکدادان، واقیعی عێراقی لە ئێستادا پێویستی بە هاوکاری و هەماهەنگی نێوان لایەنە سیاسییەکان هەیە و دڵنیام کە کۆدەنگی نێوان نەتەوەکانی کەرکوک و لایەن و مەزهەبەکان بەمەبەستی ڕێککەوتن لەسەر پێکهێنانی حکومەتێکی خۆجێی کە نوێنەرایەتی خەڵکی کەرکوک بکات دروست دەبێت، وە پاڵپشتی حکومەتی فیدراڵی و هەرێم پێویستە بۆ بەدیهێنانی ئەم مەرجە.
کەناڵی عەرەبيە ئەلحەدەس: کەواتە جەنابتان داوا لە هەموو لایەنەکانی کەرکوک کە ئەنجامەکان قبوڵ بکەن و وەک یەک تیم کار بکەن؟
سەرۆک کۆمار: بێگومان ئەمە زۆر پێویست و گرنگە بۆ ئایندەی کەرکوک، ئەگەر کەرکوک لەڕووی گەشەپێدان و خزمەتگوزارییەوە بەراورد بکەین، هێشتا نەگەیشتووەتە ئاستی هەندێک پارێزگای دیکە، و ئەمەش دەگەڕێتەوە بۆئەو خراپ بەڕێوەبردنە کە لە ئێستادا لە کەرکوکدا هەیە، بۆیە لە بەرژەوەندی حکومەتی فیدراڵی و بەرژەوەندی هەرێمە لە پێناو حکومەتێکی ناوخۆیی لە کەرکوک کە نوێنەرایەتی هەموو لایەنە سیاسی و نیشتمانییەکانی کەرکوک بکات.
کەناڵی عەرەبيە ئەلحەدەس : دەچینە سەر دۆسێی ئاو، هەواڵێکی ترسناک هەیە لەسەر ئایندەی ئاوی عێراق، کەسانێک هەن دەڵێن دوو ڕووبارەکە نامێنن، باس لەوە دەکرێت کە عێراق بڕێکی زۆر ئاوی ژێر زەوی لەدەست دەدات، ئەو ڕێگایانە چین کە عێراق دەتوانێت بەشە ئاوی خۆی لە تورکیا و ئێران وەربگرێت؟
سەرۆک کۆمار: کێشەی ئاو کێشەیەکی جیهانییە، بەداخەوە لە ناوچەی ڕۆژهەڵاتی ناوەڕاستدا ڕێژەی ئاو بەراورد بە ڕووبەری زەوی کەمە، پێشتر ژمارەی دانیشتوانی ناوچەکە کەمتر بوو لەوەی ئێستا، پێویستیی هەر وڵاتێک کەمتر بوو لە وەی ئێستا ، بەداخەوە گۆڕانی کەشوهەواش بووەتە هۆی کەمبوونەوەی ڕێژەی ئاوی ناوچەکە، کەمی باران و بەفر لە ناوچەکەدا بووە هۆی کەمبوونەوەی ئەو بڕە ئاوەی کە پێویستمانە.
سەبارەت بە عێراقیش بەختەوەرین کە ڕووبار و لق و دەریاچەمان هەیە، پێشتر بارودۆخی ئێمە لە وڵاتانی ناوچەکە باشتر بوو، ئێستا دۆخەکە جیاوازە، سەرچاوەی ئاوی ئێمە لە وڵاتانی سەرەوەوە دێت، ئەو وڵاتانەش دەستیان کردووە بە دروستکردنی بەنداو وگلدانەوەی ئاوی یەدەگ بە بڕێکی زۆرتر .
ئێمە کار لەسەر ئەو بنەمایە دەکەین کە عێراق پشکێکی دادپەروەرانە و بڕی ئەو ئاوەی کە پێویستمانە بەدەستبهێنین و پەیوەندیمان لەگەڵ وڵاتانی دراوسێمان هەیە لەم ڕووەوە، و هەندێکجار دەگەینە ڕێککەوتن و لێکتێگەیشتنێکی باش، بەڵام هەندێ کجار ئەوانیش پێشێلکاری دەکەن .
ئێمە سوورین بۆ چارەسەرکردنی کێشەکان لە ڕێگەی پەیوەندی و هەماهەنگی لەگەڵ لایەنەکانی تر، ئەم وڵاتانە ئەرکیان هەیە، ئێمەش ئەرکمان هەیە.
ئێمە گەشبینین بە بەدەستهێنانی ئەنجامی باش سەبارەت بە دابینکردنی ئاو، ئێمەش لە عێراق داوای پشکێکی دادپەروەرانە لە ئاو دەکەین و گەڕانەوە بۆ ئەو دۆخەی پێش دروستکردنی بەنداوەکان کە پێشتر لەم وڵاتانەدا نەبووە، داوای دادپەروەری دەکەین پشکی ئاو بۆ کشتوکاڵ و ئاوی خواردنەوە وپەیوەندیبە پێویستی دانیشتوانی وڵاتەکەمانەوە هەیە، وەک دەزانن ژمارەی دانیشتوان زیادی کردووە و پێویستمان بە ڕێژەیەکی زۆرترە لە جاران، عیراق هەماهەنگی لەگەڵ تورکیا و ئێران هەیە، ئێمە گەشبینین بە گەیشتن بە چارەسەری دڵخۆشکەر.
کەناڵی عەرەبيە ئەلحەدەس : ئەگەر عێراق لەگەڵ تورکیا و ئێران نەگەنە لێکتێگەیشتن، ئایا داهاتووی ئاوی عێراق لە مەترسیدایە؟
سەرۆک کۆمار: ئایندەی ئاو لە عێراقدا لە مەترسیدا دەبێت و خەڵکی عێراقیش ڕووبەڕووی زیان دەبنەوە، من پێم وایە بڕینی ئاو بۆ هەر گەلێک لە ئاستی جیهانی یان ناوخۆدا قبووڵکراو نییە و هیچ قسەیەکم نەبیستوە لە هیچ کەسێک لە وڵاتانی دراوسێ سەبارەت بە بڕینی ئاو ئەمە قبوڵ ناکرێت و نەخوازراوە.
کەناڵی عەرەبيە ئەلحەدەس : پرسی سەروەری عێراقیش هەیە، تورکیا بۆردومانی هەرێم دەکات بەبیانوی بونی رێکخراوی تیرۆریستی لە سلێمانی کە دوژمنایەتی تورکیا دەکەن، ئێرانیش دەڵێت، ڕێکخراوی دژ بەبەرژەوەندیەکانمان لە ناوچەکەدا هەن ، چۆن لە سەروەری عێراق دەڕوانن؟
سەرۆک کۆمار: پێموایە ئەو دوو بارودۆخە جیاوازن، لەگەڵ کۆماری ئیسلامی ئێران بەڵێ گلەیی لە بوونی بەشێک لە هێزی ئۆپۆزسیۆنی کوردی ئێران لە ناوچەی کوردستان هەیە، ئێمە دەستمان بە دیالۆگ کردووە بۆ ئەوەی بگەینە چارەسەری قبوڵکراو بۆ هەردوو لایەن، هەروەها بۆ پاراستنی سنوورەکان لە لایەن هەردوو لاوە.
بەڵام بەداخەوە دۆخەکە لەگەڵ تورکیادا جیاوازە بەبەردەوامی پێشێلکارییەکان کە بە درێژایی ڕۆژ وهەموو کاتژمێرەکان ڕوودەدەن ، نەک تەنها لە سلێمانی، بەڵکو لە هەولێر و دهوک و ناوچە جیاجیاکانی هەرێمی کوردستان، لە فڕۆکە شەڕکەرەکان، فڕۆکەی بێفڕۆکەوان، و بنکە تورکییەکانەوە .
ئێمە وەک وڵاتێکی سەربەخۆ ئەمە قبوڵ ناکەین و پێویستە ئەوانیش وەک وڵاتێکی دراوسێ ڕەچاوی بارودۆخی ئێمە بکەن، هەندێک جار پێشێلکارییەکانیان دەبێتە هۆی کوشتنی خەڵکی بێتاوان و شەهیدبون لەناو دانیشتوانی ناوچەکە، هەندێک جاریش ئەو سەردانکەرانەی دێنە ناوچەکە دەبنە قوربانی بۆردومانی تورکیا، پەیوەندییەکانمان لەگەڵ تورکیا بەردەوامە و هیوادارین دۆخی ئێمە لەبەرچاو بگیرێت، ئەم پێشێلکاریانە جێگەی قبوڵکردن نین لەلایەن گەلی عێراق و هەرێمی کوردستانەوە.
کەناڵی عەرەبيە ئەلحەدەس: ئێوە لەگەڵ لایەنی ئێرانی گەیشتوونەتە لێکتێگەیشتن، بەڵام ئایا دەکرێت لەگەڵ تورکیا بگەنە ڕێککەوتن؟ چونکە دەڵێت پارتی کرێکارانی کوردستان لە خاکی عێراقەوە هەڕەشە لە وڵاتەکەی دەکات، دەستووری عێراقیش ڕوونە کە ڕێگەپێدراو نییە خاکی عێراق وەکو سەرچاوەی هێرش بۆ هێرشکردنە سەر هیچ لایەنێک بەکاربهێنرێت؟
سەرۆک کۆمار: ئێمە دژی بەکارهێنانی خاکی عێراق وهەرێمی کوردستانین دژی هەر وڵاتێکی دراوسێ، ئەمە سیاسەتی ئێمەیە و لەبارەیەوە بۆچونمان ڕوونە، بەڵام بۆ ئەوەی بگەینە ڕێکەوتن بۆ چارەسەری کێشەکە، دەبێت دانوستان و ڕێککەوتنی لەسەر بکرێت لەگەڵ تورکیا، هەروەک چۆن لەگەڵ ئێران ڕێککەوتین.
کەناڵی عەرەبيە ئەلحەدەس : لە سەر دۆسێی پەیوەندییەکانی دەرەوە قسەبکەین، ئایا عێراق ئەمڕۆ لە جەمسەرێکدایە ؟ چۆن لە پەیوەندییەکانی دەرەوەی عێراق دەڕوانن؟
سەرۆک کۆمار: ئێمە ماوەیەکی زۆر بە دەست پەیوەندییەکانی دەرەوە ناڵاندمان ، سوپاس بۆ خودا ئێستا لە پەیوەندییەکانی دەرەوەدا لە دۆخێکی باشداین، یەکەم: پەیوەندییە ناوچەییەکانمان لە ئەنجامی پەیوەندی و ئاڵوگۆڕی شاندەکان باش و سەرکەوتون بەشێکیشیان دەرئەنجامی پەیوەندییە ئابوورییەکان و وەبەرهێنانە لە عێراق.ئەم پەیوەندییە ناوچەییانە و لەگەڵ جیهان بە گشتی دەبێت قووڵتر بکرێنەوە، پەیوەندییەکانمان لەگەڵ ئەوروپا و ئەمریکا و وڵاتانی دیکەش زۆر باشە و ئێمەش لەعێراق هەوڵدەدەین پەیوەندییەکانمان لەگەڵ هەموو کۆمەڵگەی نێودەوڵەتی پتەوتر بکەین .
کەناڵی عەرەبيە ئەلحەدەس: پەیوەندیەکانتان لەگەڵ شانشینی سعودیە چۆنە ؟
سەرۆک کۆمار: سوپاس بۆ خودا، پەیوەندییەکی باش و بەهێز هەیە و ئامانجیشمان قوڵترکردنی ئەو پەیوەندییەیە لە هەموو لایەنە سیاسی و دیپلۆماسیەکاندا، پشتیوانی لە ڕۆڵی سعوودیە لە ناوچەکەدا بە گشتی دەکەین و ئێوەش ئەوە دەزانن عێراق ڕۆڵی هەبوو لە باشترکردنی پەیوەندی نێوان شانشینی سعودیە و کۆماری ئیسلامی ئێران و من پێموایە بەهێزکردنی پەیوەندییەکانی شانشینی سعودیە لەگەڵ وڵاتانی ناوچەکە گرنگە و سودی هەیە بۆ سەربەخۆیی هەموو ناوچەکە.
کەناڵی عەرەبيە ئەلحەدەس : پرسی پەیوەندی لەگەڵ هاوپەیمانی نێودەوڵەتی، لە ڕاستیدا ئەمریکا ئەو وڵاتە بوو کە ڕژێمەکەی سەدام حوسێنی ڕووخاند، هەروەها ڕێککەوتنێکی ستراتیژی لە نێوان بەغدا و واشنتۆن هەبوو، چۆن شێوەی پەیوەندی نێوان بەغدا و واشنتۆن دەبینی ؟
سەرۆک کۆمار: پەیوەندییەکە بەپێی ئەو ڕێککەوتنانەیە کە هەیە، ئێمەش جێبەجێکردنی ڕێککەوتننامەکان لەبەرچاو دەگرین، بەڵام چۆنیەتی کار و چالاکی هاوپەیمانی نێودەوڵەتی جیاواز بوو لەوەی کە لە ڕابردوودا هەبوو، لە سەرەتادا دوای ساڵی 2003 عێراق لەژێر دەسەڵاتی هاوپەیمانی نێودەوڵەتیدا بوو و دواتر کەوتە ژێر داگیرکارییەوە، ئێستاش داگیرکاری کۆتایی هاتووە و حکومەتێکی دیموکراسیمان هەیە، و کاردەکەین بەپێی ڕێککەوتنەکانی ئێستای نێوان عێراق و وڵاتانی هاوپەیمانی نێودەوڵەتی .
کەناڵی عەرەبيە ئەلحەدەس : کەواتە پێویستتان بە ڕاوێژکار و مەشق و ڕاهێنانە و پێویستتان بە هێزی شەڕکەر نییە؟
سەرۆک کۆمار: ئەم بابەتە لە ڕێککەوتنەکانی ئێستادا هەیە، ڕۆڵی هاوپەیمانی نێودەوڵەتی ئێستا ڕۆڵی مەشق و ڕاهێنان و بەرەنگاربوونەوەی تیرۆرە، بێگومان بەرەنگاربوونەوەی تیرۆر نەک هەر لە عێراق، بەڵکو لە هەموو جیهاندا، ئێمە پابەندین بە ڕێککەوتنەکانەوە ، ئێستاش هێزەکانی هاوپەیمانی نێودەوڵەتی ئامادەن نەک بۆ ئەرکی شەڕ، بەڵکو بۆ مەشق و ڕاهێنان و هاوکاری لەگەڵ هێزەکانمان، ئێمە پاڵپشتی هاوپەیمانی نێودەوڵەتی بەرز دەنرخێنین بۆ ڕاهێنانی هێزەکانمان و بەرەنگاربوونەوەی تیرۆر لە عێراق.
کەناڵی عەرەبيە ئەلحەدەس : چۆن دەتوانن هاوسەنگی لە نێوان واشنتۆن و تاران بکەن؟ لە کاتێکدا ململانێ لە ناوچەکەدا هەیە و کاریگەری زۆری لەسەر دۆخی عێراق داناوە.
سەرۆک کۆمار: پەیوەندییەکانمان لەگەڵ کۆماری ئیسلامی ئێران باش و به هێزه و بۆ ئێمه پەیوەندییەکی گرنگه و سنووری دوور و درێژمان لەگەڵیان هەیه که نزیکەی 1400 کم درێژ دەبێتەوه، سەبارەت بەئەمریکاش سوپاسیان ده که ین بۆ یارمەتیدانی عێراق لە ڕووخاندنی ڕژێمێکی دیکتاتۆری کە هەڕەشەی لە ناوچەکە و جیهان بە گشتی دەکرد، پەیوەندییەکانمان لەگەڵ ئەمریکا بەهێزە و کاردەکەین بۆ هاوکاریکردن لە زۆربەی بوارەکاندا بەتایبەتی زانستی و بازرگانی.
کەناڵی عەرەبيە ئەلحەدەس : واتە ڕێگە نادەن ململانێی ناوچەیی لەسەر خاکی عێراق ڕووبدات؟
سەرۆک کۆمار: ئێمە وڵاتێکی سەربەخۆین، سەربەخۆیی عێراقیش بۆ ئێمە لە هەموو ڕێککەوتنەکانی تر گرنگترە، بۆیە هەمووان دەزانن کە ئێمە کار بۆ پاراستنی سەربەخۆیی خۆمان دەکەین، و لە ئێستادا سەرنجمان لەسەر سەربەخۆیی عێراقە.
کەناڵی عەرەبيە ئەلحەدەس : ھەڵبژاردنێک ھەیە پێش کۆتایی ئەمساڵ، ھەڵبژاردنی ئەنجومەنی پارێزگاکان ئەنجام دەدرێت و گرنگن، چۆن دەکرێت گەرنتی بێگەردی ئەو ھەڵبژاردنانە بکرێت؟ جەنابی سەرۆک وەک دەزانن لە سەرەتاوە باس لە پاکی دەکرێت و دوای ڕاگەیاندنی ئەنجامەکان لایەنەکان ناڕەزایەتی دەردەبڕن و ئەنجامەکان بە ساختەکاری دەزانن.
سەرۆک کۆمار: لە زۆربەی وڵاتانی جیهان حاڵەتی لەم جۆرە ڕوودەدەن، لە ئەوروپا و تەنانەت لە ئەمریکاش کێشە لە پاکی هەڵبژاردنەکاندا هەیە، لای خۆمانەوە بە هاوکاری ڕێکخراو و شاندی ناحکومی کار دەکەین بەبەشداری لە نوێنەرانی وڵاتانی ناوچەکە و نەتەوە یەکگرتووەکان و چاودێری چڕی دادوەرەکانی عێراق بە مەبەستی دڵنیابوون لە پاکی هەڵبژاردنەکان و هەموو لایەنە سیاسییەکان جەخت لەسەر پێویستی دەستەبەرکردنی بێگەردی هەڵبژاردنەکان دەکەنەوە بۆ بەرژەوەندی گەلی عێراق.
کەناڵی عەرەبيە ئەلحەدەس: چۆن سەیری نەبوونی ڕەوتی سەدری دەکەیت لە گۆڕەپانی سیاسی عێراقدا ؟
سەرۆک کۆمار: لەگەڵ نەبوونی هیچ لایەنێکی سیاسی نیشتمانی و تائیفی لە گۆڕەپانی عێراقدا نیم، هیوا و خواستم ئەوەیە کە هەموو لایەنە سیاسییەکانی ئێستا بەشداری هەڵبژاردن بکەن و بۆچوونەکانیان بە شێوەیەکی ئاشتیانە و دیموکراسیانە دەرببڕن و شێوازێکی دادپەروەرانە لە پێناو هەڵبژاردنی نوێنەرانی گەل و خزمەتکردنی گەلی عێراق پەیڕەو بکەن.
کەناڵی عەرەبيە ئەلحەدەس : کەواتە ئێوە پشتگیری گەڕانەوەی ڕەوتی سەدری دەکەن، وە داوا لە ڕەوتی سەدری دەکەن بگەڕێنەوە بۆ ژیانی سیاسی ؟
سەرۆک کۆمار: من پشتیوانی هەموو ڕەوتەسیاسیەکان دەکەم و ڕەوتی سەدریش لە دەرەوەی ڕەوتەسیاسیە عێراقیەکان نییە و لەم کاتەی ئێستاشدا ڕەنگە لە دەرەوەی حکومەت بن بەڵام لە چوارچێوەی دەوڵەتی عێراقدان.
کەناڵی عەرەبيە ئەلحەدەس : دەچمە سەر بابەتی هەموارکردنەوەی دەستوور، کەسانێک هەن پێیان وایە تەنانەت سەرۆکی ئەنجومەنی باڵای دادوەری فایق زەیدان، باسی پێویستی هەموارکردنەوەی دەستووری دەکات بۆ ئەوەی بەشێک لە بابەتەکان ڕوون بێتەوە کە لە هەموو هەڵبژاردنێکدا ڕوودەدەن، وەک ئەوەی کێ گەورەترین فراکسێۆنی سیاسیە ؟
سەرۆک کۆمار: یەکەم: هیچ دەستوورێک لە جیهاندا نییە کە هەموو کێشەکانی دەوڵەت چارەسەر بکات، دووەم: هەندێک وڵات هەن بەهیچ شێوەیەک دەستووریان نییە و منیش دەڵێم دەستووری ئێمە باشە و لەلایەن هەمووان پەسەند کراوە لایەنە سیاسییەکان هەر لەسەرەتاوە و تا ئێستاش کارمان لەگەڵ دەستوردا کردووە بەبێ بونی هیچ کەموکورتیەک، بەڵام لە هەموو جیهاندا هەندێک بڕگەی دەستووری پێویستی بە ڕوونکردنەوە هەیە ، لە عێراق ئەمە لەلایەن پەرلەمانی عێراق یان یاسای عێراقەوە دەکرێت ، بۆیە ئەگەر هەندێک بڕگەی هەبێت کە ناتوانین لە ئێستادا جێبەجێی بکەین، دەبێت یاسایەکمان هەبێت لەناو پەرلەمان بۆ چارەسەرکردنی کێشەکان .
کەناڵی عەرەبيە ئەلحەدەس : دوو پرسیاری ترم هەیە، یەکەمیان پرسی لێبوردنی گشتییە. ئایا پشتگیری ئەوە دەکەیت کە لێبوردنی گشتی لە عێراقدا هەبێت یان ڕوونکردنەوە لەسەر هەندێک بابەتی پەیوەست بە لێبوردنی گشتی؟
سەرۆک کۆمار: ڕاشکاوانە بڵێم لێبوردنی گشتی وەک وشەیەک، بە خەیاڵمدا نییە هیچ وڵاتێک لە جیهاندا بتوانێت جێبەجێی بکات، من پێم وایە لێبوردن بۆ ئەو کەسانەیە کە شایەنی ئەوەن لە زیندان ئازاد بکرێن یان سزاکانیان کەم بکرێتەوە، بەڵام بە مەرجی پەسەندکردنی لەلایەن پەرلەمان.
کەناڵی عەرەبيە ئەلحەدەس : کەواتە ئێوە لێبوردنی گشتی پەسەند دەکەن ئەگەر لە ڕێگەی پەرلەمانەوە پەسەند بکرێت؟
سەرۆک کۆمار: بەدڵنیاییەوە، چونکە پەرلەمانەکەمان نوێنەرایەتی هەموو لایەنە سیاسییەکان دەکات.
کەناڵی عەرەبيە ئەلحەدەس : وەک پارێزەری دەستوور، بڕگەگەلێکی زۆر هەن کە پشتگیری لە ئازادیی میدیایی و خۆپیشاندان و مافی مرۆڤ دەکەن، کۆمەڵێک ڕاپۆرتی ترسناک هەیە سەبارەت بە پاشەکشێکردنی مافەکانی مرۆڤ لە عێراق.
سەرۆک کۆمار: پێموایە ئەمە بە هیچ شێوەیەک ڕاست نییە، سەیری ژمارەی کەناڵە سەتەلایتەکان و ڕۆژنامەکان و لاپەڕەکانی سۆشیال میدیا بکەن، هیچ وڵاتێک لە جیهاندا نییە کە ئەم ژمارانەی هەبێت، ئێمە جۆرێک ئازادی ڕەهامان هەیە، کەهەندێک جار بەبێ بەرپرسیارێتی میدیاکان بابەت بڵاو دەکەنەوە ، من پێم وایە ئازادی مرۆڤ و تاک و مافی مرۆڤ بە باشی بوونی هەیە، بەڵام هیچ وڵاتێک لە جیهاندا سەد لە سەد ڕازی نییە، وە دەبێت ڕەچاوی هەلومەرج و بارودۆخی ئێمە بکرێت، ئێمە بەو دەیان ساڵدا تێپەڕین لە ئازار و پیلانگێڕی خراپ، گەندەڵی، کێشە ناوخۆییەکان، کێشەکانی دەرەوە، هەربۆیە ئێستا سەرنجمان لەسەر بەرەنگاربوونەوەی گەندەڵییە، تیرۆر و خەمی ئاسایش و سەقامگیری کاری لە پێشینەمانە.
کەناڵی عەرەبيە ئەلحەدەس : بەڵام لە هەمان کاتدا تیرۆرکردنی چالاکوان و ڕۆژنامەنووسان هەیە.
سەرۆک کۆمار: ئەمە پێشتر ڕوویدا نەک لەم قۆناغە، ئێمە بە تاوانی دەزانین بەرامبەر هەرکەسێک یان رۆژنامەنوسێک ، هەموو دۆسیەکان لەژێر چاودێری پۆلیس و دەسەڵاتی دادوەریە بۆ بەدواداچوونیان، تا ئێستاش کەسانێک هەن کە تیرۆریستن و کاری خراپ ئەنجام دەدەن، ئەمانە لە هەموو وڵاتانی جیهاندا بوونیان هەیە، بەڵام دۆخی ئەمنی و سەقامگیری عێراق ئێستا باشە و کار لەسەر بەهێزکردن و پاراستنی دەکەین.
