پسپۆڕانی دەروون دروستی هانمان دەدەن کە بە بایەخەوە لە گرنگی زەردەخەنەیەک بڕوانین، چونکە زەردەخەنە نەک هەر کارلێکێک لە نێوان دوو کەسدا دروست دەکات، بەڵکو تا زیاتر زەردەخەنە بکەین، مێشکمان تەندروستتر دەبێت، بەگەنجی دەمێنینەوە، پەیوەندییەکانمان باشتر دەبن و خۆشەویستی نێو کۆمەڵەکەمان دەبین.
زەردەخەنەکردن دەتوانێت تەندروستیت باشتر بکات و تەنانەت یارمەتیت بدات بۆ بەڕێکردنی تەمەنێکی درێژتر.
سوودە تەندروستییەکانی زەردەخەنە
باشترکردنی باری دەروونی
بەهۆی زەردەخەنەوە ماددەی ئەندۆرفین دەردەدرێت، ئەمەش یارمەتی مرۆڤ دەدات هەست بە دڵخۆشی و دۆخێکی ئەرێنی بکات.
لێکۆڵینەوەیەکی زانستی ئەمریکی دەریخستووە، زەردەخەنە دەبێتە هۆی باشترکردنی باری دەروونی مرۆڤ و زیادکردنی بیرکردنەوەی ئەرێنی، بۆیە کاتێک هەست بە ناجۆری دەرونت یان دڵتەنگییەک دەکەیت، هەوڵبدە زەردەخەنە بکەیت بەم کارە لەوانەیە هەست بە باشتربوونت بکەیت.
کەمکردنەوەی ئازار
پێکەنینێکی باش بەشێک لە ئازارەکانت کەمدەکاتەوە، پێکەنینیش ماددەی ئەندۆرفین دەردەدات کە ماددەیەکە ئەنزیمی دڵخۆشی بە جەستە دەبەخشێت، لە ڕاستیدا پێکەنین باشترین دەرمانە، چونکە ڕێگە بە جەستە دەدات کە ئازارشکێنی سروشتی خۆی بەرهەمبهێنێت، بۆیە با جار جارە پێکەنینێکی باشت هەبێت، چونکە تەندروست باشت دەکات.
کەمبوونەوەی پەستانی خوێن
تەندروستی دڵ زۆر گرنگە و پێکەنین یان زەردەخەنەی زیاتر یارمەتیدەرە بۆ دابەزینی پەستانی خوێن.
لە ڕاپۆرتێکدا کە کۆلێژی پزیشکانی خێزان بڵاویکردۆتەوە باس لەوە دەکات، پێکەنین دەبێتە هۆی زیادبوونی دەستبەجێی لێدانی دڵ و بەکارهێنانی زیاتری ئۆکسجین و شلبوونەوەی ماسولکەکان و دابەزینی لێدانی دڵ و دابەزینی پەستانی خوێن، تەنانەت بڕێکی کەمیش یارمەتی کەمکردنەوەی مەترسی تووشبوون بە نەخۆشییەکانی دڵ دەدات.
بەهێزی سیستمی بەرگریی لەش
پێکەنین یان زەردەخەنە یارمەتی بەهێزکردنی سیستمی بەرگریی لەش دەدات، توێژینەوەیەک ئاماژە بەوە دەکات، پێکەنین کە زۆرجار بە زەردەخەنە دەست پێدەکات، خانەکانی بەرگریی زیاد دەکات و دژەتەنەکان بۆ بەرەنگاربوونەوەی هەوکردنەکان زیاد دەکات، ئەمەش بەرگریت بەرامبەر نەخۆشیەکان باشتر دەکات.
فشاری دەروونی
زەردەخەنە یان پێکەنین وەڵامدانەوەی ڕاڕاییەکەت چالاک دەکات، ئەو توێژینەوانەی کە تاکەکان دەبوو ڕووبەڕووی دۆخە دژوارەکانی ژیانیان ببنەوە تیایدا دەرکەوتووە لەکاتی زەردەخەنەکردندا، لێدانی دڵیان کەمترە بە بەراورد بەو کەسانەی کە زەردەخەنەیان نەکردووە.
پەیوەندی باشتر لە ژیانتدا
توێژینەوەیەک، کە لەلایەن کتێبخانەی نیشتمانی پزیشکی ئەمریکاوە تەواوکراوە، ئاماژە دەدات، ئەو کەسانەی زەردەخەنە دەکەن بەزۆری وەک کەسانی دڵخوازتر دەناسرێنەوە، بە بەراورد بەو کەسانەی کە زەردەخەنە ناکەن.
بە گەنجی مانەوە
زۆرجار زەردەخەنەکردن یان پێکەنین دەتوانێت ئەو باوەڕەت پێ بدات کە تۆ لە خۆت گەنجتر دەردەکەویت.
توێژینەوەیەک لە بواری دەروونناسی پیربوون دەریخستووە، کاتێک گروپێک سەیری وێنەی دەموچاوە دڵخۆشەکان دەکەن، پێشبینیان کردووە تەمەنی ئەو کەسەی لە وێنەکەدا دیارە، بە بەراورد بە وێنەی هەمان کەس کە دەربڕینی بێلایەن یان توڕەیی هەیە جیاوازی زۆری هەیە لە رووی تەمەنەوە، بۆیە بڕۆ زەردەخەنە بکە با گەنجی بمێنیتەوە.
کاریگەری زەردەخەنە لەسەر ژیانی کۆمەڵایەتی
ئەگەر تەنها بچیتە ناو ژینگەیەکی نوێ و کارێکی نوێ و بۆنەیەکی کۆمەڵایەتی و ….هتد، کەسێک زەردەخەنەت بۆ بکات، ئەوا خۆکارانە هەست بە ئاسوودەیی زیاتر دەکەیت.
کەواتە بۆچی تاقی ناکەیتەوە و سوودی لێ وەربگریت، هەوڵبدە زیادەڕەوی نەکەیت، بەڵام ئەگەر کەسێک دەناسیت لە هەمان بارودۆخی کۆمەڵایەتی نائاساییدا کە پێشتر ئەزموونت کردووە، زەردەخەنەیەکی بەرامبەر بکە و ببەرە هۆکاری دڵخۆشی و بناغەدانانی پەیوەندییەکی بەتین.
زەردەخەنەو یاساکانی لەخۆگرتن
گومانی تێدا نییە کە زەردەخەنە ئامرازێکی بەهێزە، دەتوانێت ئارەزوویەکی متمانەدار بە کەسانی بەرامبەر بدات.
توێژینەوەکان دەریانخستووە، ئەو کەسانەی زەردەخەنە دەکەن وەک کەسێکی سەرنجڕاکێشتر هەست پێدەکرێن، چونکە تەندروستتر دەردەکەون و بەو هۆیەوە گەنجتر دەردەکەون، ڕەنگە وەک بەراوردێکی سەیر دەرکەوێت، بەڵام دەکرێ زەردەخەنەیەک پەیوەست بکرێت بە بەخشندەیی، کە لەم سەردەمی مۆدێرنەدا زۆر دەگمەنە.
