وەزیری ناوخۆی تورکیا ڕایگەیاند، تەقینەوەکەی ئەنقەرەی پایتەخت خۆکوژیی بووە.
کەمێك لەمەوبەر عەلی یەرلیکایا، وەزیری ناوخۆی تورکیا لە پەیامێکدا ڕایگەیاند، کاتژمێر 9:30ی بەیانی ئەمڕۆ دوو “تیرۆریست” بە ئۆتۆمبێلێکەوە لە دەروازەی ئاسایشی گشتی وەزارەتی ناوخۆ نزیك بوونەتەوە و بە بۆمب هێرشیان کردووە.
ڕونیشیکردەوە یەکێكیان خۆی تەقاندووەتەوە و دووەمیشیان کوژراوە.
وەزیری ناوخۆی تورکیا ئەوەشیخستەڕوو کە دوو ئەفسەری پۆلیس لە ڕووداوەکەدا بەسووکی برینداربوون.
پێشتر میدیای تورکیا بڵاویکردبووەوە کە لە نزیك پەرلەمانی تورکیا لە ئەنقەرەی پایتەخت دەنگی تەقینەوە و بە دوایدا دەنگی تەقە بیستراوە.
ئەوەشخرابووەڕوو کە ئۆتۆمبێلی فریاکەوتن بە ئاڕاستەی شوێنی تەقینەوەکە ڕوویشتووە.
تەقینەوەکە لە کاتێکدایە کە بڕیارە پاشنیوەڕۆی ئەمڕۆ دانیشتنەکانی پەرلەمانی تورکیا دەستپێبکەنەوە.
