ڕێکخراوی یونسێفی سەربە نەتەوە یەکگرتووەکان ڕایگەیاند، لەمساڵدا ڕێژەی گیانلەدەستدانی کۆچبەران لە دەریای ناوەڕاستدا بەراورد بە ساڵی ڕابردوو سێ هێندە زیادیکردووە. دەشڵێت، ” ١١ هەزار و ٦٠٠ منداڵ لە دەریای ناوەڕاستەوە گەیشتونەتە ئیتاڵیا.”
رێکخراوەکە لە ڕاگەیەنراوێکدا ئەوەیخستووەتەڕوو، بەپێی ئامارەکان لەمساڵدا نزیکەی ٩٩٠ کۆچبەر لە دەریای ناوەڕاست گیانیان لەدەستداوە یان بێسەروشوێن بوون و بەراورد بە ساڵی ڕابردوو سێ هێندە زیادیکردوە کە ژمارەیان ٣٣٤ کۆچبەر بووە.
ئاماژەی بەوەکردووە، لە سەرەتای ئەمساڵەوە ١١ هەزار و ٦٠٠ منداڵ لەڕێگەی دەریای ناوەڕاستەوە کە بە مەترسیدارترین رێگای کۆچکردن دادەنرێت، گەیشتوونەتە ئیتاڵیا بەراورد بە هەمان ماوەی ساڵی رابردوو ٦٠٪ زیادیکردووە.
ئەمە لەکاتێکدایە، لە ماوەی ڕابردوودا، وڵاتانی ئەوروپا و بەتایبەت ئیتاڵیا و بەریتانیا چەندین ڕێکارییان گرتووەتە بەر بۆ بەهێزکردنی سنورەکانیان و ڕێگریکردن لە چوونی کۆچبەران بۆ ئەو وڵاتانە.
