ئەمڕۆ دووەم ڕۆژی کۆنگرەی پێنجەمی یەکێتیی نیشتیمانی کوردستان بەڕێوەدەچێت، سەبارەت بە پەیڕەوی ناوخۆی حزبەکە و هەڵبژاردنی ئەنجومەکان گفتوگۆ و دەنگدان دەکرێت.
ئەندامان و بەرپرسانی یەکێتیی نیشتیمانی کوردستان سەبارەت بە کۆنگرەی پێنجەم لێدوانیان بۆ ڕۆژنامەنووسان دا.
سەرکۆ گەڵاڵی، ئه‌ندامی فراكسیۆنی یه‌كێتی له په‌رله‌مانی كوردستان ڕایگەیاند، ” ئەندامانی کۆنگرە کاتژمێر ٩ بۆ ١٠ دەتوانن بەشداری هەموارکردنەوەی پەیڕەو بکەن، گفتوگۆی ئەندامانی کۆنگرە لەو شەش لیژنەی پێکهێنراوە تا کاتژمێر ٢ بەردەوامدەبێت، دواتر کۆنگرە دەستپێدەکاتەوە و دەنگدان لەسەر بڕگەکانی پەیڕەوی ناوخۆ ئەنجامدەدرێت”.
وتیشی، ” سێ ئەنجومەن دروست دەبێت بریتین لە: ئەنجومەنی سەرکردایەتی یەکێتی کە گفتوگۆ لەسەر ژمارەی ئەندامانی دەکرێت، لە نێوان ٥١ بۆ ٦١ ئەندام دیاریدەکرێت، ئەنجومەنی پاراستنی بەرژەوەندییە باڵاکانی یەکێتی لە نێوان ٢١ بۆ ٣١ ئەندام دەبێت و سکرتێری بۆ دادەنرێت، ئەنجومەنی پشتیوانی کە بافڵ تاڵەبانی سەرۆکایەتی دەکات لە ٧١ بۆ ١٠٠ دەبێت و دەنگدانی لەسەر دەکرێت، ئەمڕۆ پەیڕەو و هەموارکردنەوەی دەنگی لەسەر دەدرێت و سبەینێ هەڵبژاردن دەکرێت”.
فەهمی بورهان، سەبارەت بە کۆنگرەی پێنجەمی یەکێتی ڕایگەیاند، ” کۆنگرەکە دەتوانێت ئامانجەکانی بەدیبهێنێت، تێیدا کێشەکانی ناو یەکێتیی و کۆمەڵگەی کوردی گفتوگۆی لەسەر دەکرێت، بە ئامانجی دروستکردنی هێزێکی سیاسی، کە توانای وەڵامدانەوەی پرسیارە مێژووییەکانی کۆمەڵانی خەڵکی کوردستانی هەبێت”.
غازی کەرکوکی، ئاماژەی بەوەکرد، ” کەموکورتیییەکانی حزب بە تەنها دوو ڕۆژە چارەسەر نابێت، گرفت و نیگەرانی زۆر هەیە کە سەرجەم خەڵکی کوردستان دەیزانن، هاوکات ئێمەش بەشێکین لەوانەی لە هەرێمی کوردستان ڕوودەدات”.
وتیشی، ” نیگەرانییەکان و کێشەکان لە ڕێگەی لیژنەی سکاڵاوە پێشکەشدەکرێت و خۆم ١٠ بۆ ١٥ سکاڵام نوسیووە، یەکێتییەکان ئازادن و دەتوانن سکاڵاکانیان پێشکەشبکەن”.
غازی کەرکوکی، ڕایگەیاند، ” ئاساییە بەشێک لە ئەندامان بەشداری کۆنگرەکە نەبووبن، ئەمەش بە مانای یەکێتی نەبوونیان نایەت، ڕاستە جیابوونەوەی بەشێک لە ئەندامان و بەرپرسانی یەکێتی زیان دەگەیەنێت، بەڵام یەکێتی وەک خۆی دەمێنێتەوە چونکە مێژوویەکی درێژی هەیە”.
سەعدی ئەحمەد پیرە، لە وەڵامی ڕۆژنامەنووسان سەبارەت بە خۆ کاندیکردنەوەی وتی، ” پێتان خۆشە کاندیدبم بۆ سەرکردایەتی؟ ئەگەر پێتان خۆشە خۆم کاندید دەکەمەوە.”
هاوکات بڵێسە جەبار فەرمان سەبارەت بە خۆ کاندیدکردنەوەی وتی، ” دەبێت بزانم ڕکابەرەکانم کێن و دەردەچم یاخود نا، ئەو کاتە بڕیاردەدەم”.
جەزا سەید مەجید، ئەندامی پێشووی سەرکردایەتی یەکێتی بۆ ڕۆژنامەنووسان ڕایگەیاند، ” خۆم هەڵدەبژێرمەوە بۆ ئەندامی ئەنجومەنی سەرکردایەتی، ئاساییە بەلامەوە ئەگەر دەرنەچم و یەکێتی هەر کارێکم پێبدات ئەنجامی دەدەم”.
دوێنێ كۆنگره‌ى پێنجه‌مى یه‌كێتى له‌ته‌لارى هونه‌رى شارى سلێمانى به‌به‌شدارى ٦٠٠ ئه‌ندام ده‌ستىپێکرد، شەش لیژنە پێکهێنرا و بڕیارە ئه‌مڕۆ په‌یڕه‌وی ناوخۆی حزبه‌كه هه‌موار بكرێته‌وه.
