وەزیری پەروەردە داوا لە مامۆستایان دەکات کۆتایی بە بایکۆتکردنی دەوام بهێنن و دەڵێت، بایکۆت کێشەی مووچە چارەسەر ناکات.
ئەمڕۆ دووشەممە، ئالان حەمەسەعید، وەزیری پەروەردەی هەرێمی کوردستان دەربارەی بایکۆتکردنی دەوام لە لایەن مامۆستایانی سنووری پارێزگای سلێمانی و هەڵەبجە ڕایگەیاند، لەگەڵ هەموو مافێکی مامۆستایانی دامەزراو و وانەبێژداین و مووچە مافێکی بنەڕەتییانە.
داواشی لە مامۆستایان کرد بگەڕێنەوە بۆ ناوەندەکانی خوێندن، وتی: هەموومان دەزانین چۆن مامەڵە لەگەڵ شایستە داراییەکانی هەرێمی کوردستان کراوە و بایکۆت و داخستنی ناوەندەکانی خوێندنیش کێشەی مووچە چارەسەر ناکات.
وەزیری پەروەردە وتیشی: تێدەگەم دۆخی مامۆستایان سەختە، بەڵام ئەم قۆناغە سەختەش تێدەپەڕێت و قۆناغێكی باشتر و گەشتر دێتەئاراوە.
هەرچەندە لەمڕۆوە حکومەتی هەرێمی کوردستان دەستی بە دابەشکردنی مووچەی مانگی تەمموز کردووە و بڕیارە هەفتەی داهاتووش مووچەی وەزارەتی پەروەردە دابەش بکرێت، بەڵام مامۆستایانی وانەبێژ بڕیاریانداوە بایکۆت نەشکێنن و گردبوونەوەی ناڕەزاییش ئەنجام بدەن.
