زمانی کوردی لە زاراوەی سۆرانی بۆ بەشی خزمەتگوزاری وەرگێڕی ڕاستەوخۆی دەنگی گوگڵ زیادکرا، دەتوانرێت وەرگێڕانی کوردی بۆ ڤیدیۆکان بکرێت.
بۆکان جاف، دامەزرێنەری کۆمەڵەی گوگڵ کراودسۆرس لە عێراق و ھەرێمی کوردستان بڵاویکردەوە، زمانی کوردی (زاراوەی سۆرانی) چووە لیستی زمانەکان لە وەرگێڕی ڕاستەوخۆی دەنگی کە پشت بە وەرگێڕی گوگڵ دەبەستن.
ئاماژەی بەوەشکرد، لێرە بەدواوە ھەموو ڤیدیۆکانی ئینتەرنێت بە یەک کلیک دەتوانن وەرگێڕانی بۆ بکەن بۆ کوردیی ناوەندی، ھەروەھا ھەر زمانێک لە ھەر شوێنێک بینیتان ڕاستەوخۆ دەتوانن وەرگێڕانی بۆ بکەن.
هاوکات ساڵانێکە وەرگێڕانی گوگڵ یارمەتی شکاندنی بەربەستەکانی زمانی داوە و کۆمەڵگاکانی سەرتاسەری جیهان بەیەکەوە دەبەستێتەوە، ساڵی ڕابردوو کۆمپانیای گوگڵ زمانی کوردی (زاراوەی سۆرانی) بۆ بەشی وەرگێڕانەکەی زیاد کرد، ئێستا ١٣٣ زمان لەناو خزمەتگوزاریی وەرگێڕانی گوگڵ بەردەستن.
