توێژینەوەیەکی نوێ دەریدەخات مەوادەکانی پاککردنەوە کە لەماڵەکاندا بەکاردەهێنرێن چەندین ماددەی کیمیاییان تێدایە کە کاریگەری خراپ لەسەر تەندروستی مرۆڤەکان بەجێ دەهێڵن.
ئاماژەی بەوەشکراوە، ئەو مەوادانەی وەک پاککەرەوە و لابەری پەڵە و بۆنخۆشکردنی جل و بەرگ و بۆنی خۆشی ناوماڵ بەکار دەهێنرێن چەندین کاریگەری خراپ لەسەر تەندروستی مرۆڤەکان بەجێ دەهێڵن و کاریگەری لەسەر بەشێک لە ئەندامەکانی جەستەی مرۆڤ دادەنێن لەوانەش چاو، لوت، قوڕگ، کۆئەندامی هەناسە و تووڕەیی مرۆڤ و ئەندامەکانی دیکەی مرۆڤ و تەنانەت هۆکارە بۆ تووشبوون بە جۆرەکانی شێرپەنجە.
توێژەرانی لێکۆڵینەوەکە تاقیکردنەوەیان لەسەر ٣٠ جۆری جیاواز لە پاککەرەوە و بۆنەکان کردووە کە لەبازاڕەکاندا دەفرۆشرێن و هەندێکیان بە هاوڕێ و دۆستی ژینگە ناودەبرێن کە لەنێویاندا سپرای و پاککەرەوە بوون، لە کاتێکدا هەندێکی تریان کەف پاودەر بوون.
زانایان جۆری ئەو ماددە کیمیاوییانەیان دەرخستووە کە کاریگەری خراپیان هەیە لەنێویاندا ماددە کیمیاییەکانی وەک ئیسانۆڵ و ئیسۆپرۆپانۆڵ کە ماددەیەکی کحولی بێ ڕەنگە و توانای گڕگرتنی هەیە لەگەڵ تۆلۆین و کلۆرۆفۆرم هاتووە و ئەم ماددانە بەشیوەیەکی بەربڵاو لە پێکهاتەی ماددە پاککەرەوەکاندا بەکاردەهێنرێن لەوانەش پاککەرەوەی شوشە و زەوی و کاشی کە پێست تووشی هەستیاری دەکەن و دەبنە هۆی تێکدانی خەو و نەخۆشی تێکدانی بۆماوەیی و زیان گەیاندن بە ئەندامەکان و تووشبوون بە جۆرەکانی شێرپەنجە.
لە توێژینەوەکەدا ئەوەخراوەتەڕوو، ئەو ماددە زیانبەخشانەی لە پێکهاتەی ئەو پاککەرەوانەدا هەن بە ئاسانی دەچنە هەواوە و ژینگەی ماڵەوە پیس دەکەن بەڕادەیەک پێنج هێندە زیاترە لە پیسبوونی هەوا لەدەرەوەی ماڵ و بۆماوەی چەند ڕۆژێک یان هەفتەیەک یاخود چەند مانگێک دەمێنێتەوە.
