لێپرسراوی دەستەی سەرپەرشتیاری لیوای ٣و٧ی تایبەت سەبارەت بە نەبوونی مووچە پەیامێك ئاڕاستەی سەرۆكی حكومەت و جێگرەكەی دەكات و ڕایدەگەیەنێت، كێ هەیە لە ئێوە بەو موچە كەم و كاتە زۆرە بتوانێ ئیدارەی خۆی و خێزانەكەی بكات؟ و دەشڵێت: ” پەتی ئارامیمان بەرەو پچڕان ئەچێ “.
لیوا، ئەیوب یوسف، لێپرسراوی دەستەی سەرپەرشتیاری لیوای ٣و٧ی تایبەتی پێشمەرگە لە پەیامەكەیدا ئاماژەی بەوەكردووە، خەریكە ئەبینە نمونەیەكی ناشیرینی حكومرانی لەسەر ئاستی جیهان و خۆرهەڵاتی ناوەڕاست بە تایبەتی، پشتگوێ خستن و ئاوڕ نەدانەوە لە بیرو ڕای گشتی جەماوەر و دابین نەكردنی مافە سەرەتاییەكانیان ئاماژەیەكی خراپە.
ڕاشیگەیاندووە، وەرن بۆ ماوەیەك ببنە كرێ نشین بزانن چەندە سەختە مووچەیەك، كە بە سێ مانگ وەری دەگرێت بەشی كرێی خانوەكەت ناكا و منداڵە بێ تاوانەكانیشت چاویان لەدەستی تۆیە.
لیوا ئەیوب دەپرسێت، “تا كەی ئەتانەوێ ئاوا بەردەوامبن؟ تا كەی خراپ و خراپتری ئەكەن؟ پەتی ئارامیمان بەرەو پچڕان ئەچێ”.
لیوا / ئەیوب یوسف، لێپرسراوی دەستەی سەرپەرشتیاری لیوای ٣و٧ی تایبەت:
بەڕێزان سەرۆكی حكومەتی هەرێمی كوردستان وجێگری سەرۆكی حكومەت
بارودۆخی خراپ و ناهەمواری كوردستان و دۆخی هاوڵاتیان و فەرمانبەران و كاسبكاران ڕۆژ بە ڕۆژ بەرەو خراپی ئەڕوات ، دو لایەنی و یەك نەگرتویی كورد و حیزبایەتی هەموو ئینتیمایەكی لەناو بردوە ، كوردستانمان لە دۆخێكی پڕ تەنگەژە و قەیراندایە لە هەموو ڕویەكەوە كە بەرەو كاول بوون ئەچێ ، ئەوەی زیاتر لە پەنجا سالە هەوڵی بۆ ئەدەین و خوێنمان بۆ ڕشتوە بە ساتێك لەدەستمان ئەچێ بە جۆرێك كە سەدان ساڵی تر بۆمان چاك ناكرێتەوە ، خەریكە ئەبینە نمونەیەكی ناشیرینی حكومرانی لەسەر ئاستی جیهان و خۆرهەڵاتی ناوەڕاست بە تایبەتی، پشتگوێ خستن و ئاوڕ نەدانەوە لە بیرو ڕای گشتی جەماوەر و دابین نەكردنی مافە سەرەتاییەكانیان ئاماژەیەكی خراپە بۆیە تكایە چاوێك بە دۆخی كوردستان و هاوڵاتیاندا بخشێننەوە، بە یەك نەگرتویی و پێك نەهاتن و ڕێك نەكەوتن ڕیسەكە مەكەنەوە بە خوری ، ناكۆكی و جیاوازیەكانتان لاخەن و ناوماڵی كورد یەك بخەن بە دەست لەناو دەستی و تەبایی و برایەتی ، حكومەت نوێنەری خەڵكە نەك نوینەری یەكێتی و پارتی و لایەنەكانیتر بۆیە حیزبایەتی بخەنە لاوە و لە بارەگاكانی مەكتەبی سیاسی و سەركردایەتیدا حیزبایەتی بكەن بەڵام لە ناو بینای حكومەتدا نوێنەری راستەقینەی خەڵكبن ،ئێمە خەباتمان بۆ ئەم ڕۆژە نەكردوە كە ئاوا زەلیلی كورد ببینین بەڵكو كردمان بۆ بەدەست هێنانی ئازادی و مافە ڕەواكانی گەلی كورد وەك هەر گەلێكیتر كە مافیان هەیە خاك و وڵاتیان هەبێ و حكومەت و دەسەڵاتی هاوزمانیان هەبێ كەچی ڕۆژ بەڕۆژ پەشیمانمان ئەكەنەوە لەو خەبات و تێكۆشانەی كردمان ، جامەكەمان خەریكە پڕ ئەبێت، ئیتر ڕێگا نادەین لە پێناو بەرژەوەندی خۆتان و تاكە كەس و لایەنێكدا دەستكەوتەكانمان وێران بكەن ، هەموو دنیا چاوی لەسەر كوردە ، ئەوە چەندین ساڵە وڵاتانی زلهێز سەرقاڵی یەك خستنەوەی هێزەكانی پێشمەرگە و دامودەزگا دو لایەنەكانیترن كەچی ئێوە بۆ مەرامی خۆتان ئامادە نین هاوكاریان بكەن و دەست لە بەرژەوەندیەكانتان هەلناگرن ، وەرن بۆ یەك ڕۆژ سەیری دۆخی خەڵك بكەن ، وەرن یەك كاتژمێر ببنە پێشمەرگە، ببنە فەرمانبەر ،ببنە ئاسایش، ببنە پۆلیس یان كاسبكار ، خۆتان بخەنە جێگای مناڵێكی شەهیدەوە یان دایكێكی جەرگ سوتاوەوە كە جەرگی خۆی بۆ ئەم خاكە بەخشیوە ، وەرن بۆ یەك سات ببنە كاسبكار و كرێكار و لە دۆخ و گوزەرانی سەختی ژیانیان تێبگەن ، وەرن بۆ ماوەیەك ببنە كرێ نشین بزانن چەندە سەختە موچەیەك كە بە سێ مانگ وەری دەگریت بەشی كرێی خانوەكەت ناكا و مناڵە بێ تاوانەكانیشت چاویان لەدەستی تۆیە ، كێ هەیە لە ئێوە بەو موچە كەم و كاتە زۆرە بتوانێ ئیدارەی خۆی و خێزانەكەی بكات؟ تا كەی ئەتانەوێ ئاوا بەردەوامبن؟ تا كەی خراپ و خراپتری ئەكەن؟
پەتی ئارامیمان بەرەو پچڕان ئەچێ .
لیوا / ئەیوب یوسف سعید
لێپرسراوی دەستەی سەرپەرشتیاری لیوای ٣و٧ی تایبەت
