سەرۆکی هەرێمی کوردستان ڕایگەیاند، یەکڕیزی و تەبایی تاقه ڕێگه‌ى تێپه‌ڕاندنى ئاڵنگارى و مه‌ترسى و سه‌ختييه‌كان و پاراستنى فيدراڵى و ماف و ده‌ستكه‌وته ده‌ستوورييه‌كانى هه‌رێمى كوردستان و هێنانه‌ديى ئێستا و داهاتوويه‌كى باشتره بۆ گه‌لى كوردستان.
نێچیرڤان بارزانی سەرۆکی هەرێمی کوردستان لە يادی 62 ساڵه‌ى شۆڕشى ئەیلوولدا پەیامێکی بڵاوکردەوە و بە “دايكى شۆڕشه‌كانى كوردستان” وەسفی کرد.
ڕاشیگەیاند، گه‌لى كوردستان له شۆڕشى ئه‌يلوودا به بڕوا و به‌ره‌نگارى و گيانفيدايى و خوێن و قوربانى، يه‌كێك له سه‌رسه‌ختترين ڕژێمه خوێناوييه‌كانى ناوچه‌كه‌ى به چۆكدا هێنا و ناچارى كرد دان به مافه‌كانيدا بنێت. وێڕاى گه‌له‌كۆمه‌كيى نه‌ياران له دژى شۆڕش و نسكۆش، مه‌شخه‌ڵى شۆڕش هه‌رگيز نه‌كوژايه‌وه و ده‌ستكه‌وته‌كانى شۆڕش بوونه بناغه‌ى هه‌موو ده‌ستكه‌وت و مافه ده‌ستوورييه‌كانى دواترى گه‌لى كوردستان.
سەرۆکی هەرێم دەڵێت: “وه‌ك چۆن يه‌كڕيزى و ته‌بايى، هێز و بنه‌ماى شۆڕشى ئه‌يلوول بوو، له‌م ياده‌شدا جه‌خت له يه‌كڕيزى و ته‌بايى و يه‌كترقبووڵكردن و هاوكاريى نێوان ته‌واوى هێز و لايه‌ن و پێكهاته‌كانى گه‌لى كوردستان ده‌كه‌ينه‌وه”.
ئەوەشی خستەڕوو کە ئەو یەکڕیزیی و تەباییە “تاقه ڕێگه‌ى تێپه‌ڕاندنى ئاڵنگارى و مه‌ترسى و سه‌ختييه‌كان و پاراستنى فيدراڵى و ماف و ده‌ستكه‌وته ده‌ستوورييه‌كانى هه‌رێمى كوردستان و هێنانه‌ديى ئێستا و داهاتوويه‌كى باشتره بۆ گه‌لى كوردستان”.
