تەندروستی سلێمانی ئاشكرای دەكات، چەند ڕۆژێکە حاڵەتەکانی تووشبوون بە کۆلێرا لە ئاستێکی دیاریکراودا وەستان، دوای ئەوەی لە ماوەی ڕابردوودا بەشێوەیەکی بەرچاو زیادی کردبوو، جەختیشدەكاتەوە، حاڵەتەکانی سکچوون و ڕشانەوە وەکو کۆلێرا مامەڵەی لەگەڵ دەکەن.
د. سەباح هەورامی، بەڕێوەبەری گشتی تەندروستی سلێمانی لە کۆنگرەیەکی ڕۆژنامەوانیدا ڕایگەیاند، “دەبێت هاووڵاتیان زۆر وریا بن و ئاوی پاک بۆ خواردنەوە و لە پێداویستی ڕۆژانەیان بەکاربهێنن، بەتایبەت ئاگاداری ئاوی بیر بن”.
ئاماژەی بەوەشکرد، “هەندێک بیر، کە ئاویان لێ دەردەهێنرێت لەژێر چاودێریدا نین و هۆکاری تووشبوونن بە کۆلێرا.”
جەختیشی كردەوە، “ئێمە حاڵەتەکانی سکچوون و ڕشانەوە وەکو کۆلێرا مامەڵەی لەگەڵ دەکەین، پێویستە هاووڵاتیان خۆیان لە هۆکارەکانی سکچوون و ڕشانەوە بپارێزن”.
د. سەباح ڕایگەیاندبوو، لە کۆتایی مانگی ئابی ڕابردوودا، 10 حاڵەتی تووشبوون بە کۆلێرا تۆمارکراوە و نەخۆشییەکە ساڵانە لە پارێزگاکە و لە سەرتاسەری عێراقدا هەبووە و دەشڵێت: “داوا لە هاووڵاتیان دەكەین لە ماوەی دوو مانگی داهاتوودا وریا بن” .
ڕۆژی 27ی ئاب، بەڕێوەبەرایەتی تەندروستی سلێمانی زیادبوونی بەرچاوی ژمارەی تووشبووانی بە سکچوون و ڕشانەوە ڕاگەیاند و جەختیشی كردەوە، “گومانیش دەکرێت ئەوە ئاماژە بێت بۆ بڵاوبوونەوەی نەخۆشی کۆلێرا”.
تەندروستی سلێمانی داواشی لە هاووڵاتیان كردبوو “خۆیان بەدوور بگرن لە بەکارهێنانی ئاوی پیس و خواردنی سەردانەپۆشراو و تەنها ئەو ئاوە بەکاربهێنن، کە لەلایەن بەڕێوەبەرایەتی ئاوی سلێمانییەوە دابینکراوە لەگەڵ ئاوی ناو دەبە و لەقوتوونراو”.
