دایکێک لە پارێزگاى واست لە باشوری عێراق، منداڵە کچەکەى هەڵدەداتە ناو ڕووباری دیجلە. پۆلیسی واست ئاماژەی بەوەکردووە، ئەوەی وای لەو ژنە کردووە ئەو کارەبکات بوونی کێشەی خێزانی بووە لەگەڵ هاوسەرەکەی.
لە ڕاگەیەنراوێکدا بەڕێوەبەرایەتیی پۆلیسی پارێزگاى واست باسی لەوەکردووە، هێزەکانی پۆلیس لەو پارێزگایە ژنێکیان دەستگیرکردووە بەتۆمەتى ئەوەى لە ناوچەى حورا لە شارى کوتى ناوەندى پارێزگاکە، منداڵە کچەکەى فڕیداوەتە ناو ڕووباری دیجلە.
بەڕێوەبەرایەتی پۆلیسی پارێزگاى واست دەڵێت، ‘دواى ڕزگارکردنی منداڵەکە لە خنکان، دەزگا ئەمنییەکان لێکۆڵینەوەیان کردووە و دەرکەوتووە لەلایەن دایکیەوە فڕێدراوەتەوە ناو ئاوى ڕووبارەکە.
لە راگەیێندراوەکەدا هاتووە، لە لێکۆڵینەوەکاندا دەرکەوتووە ژنەکە بەهۆى ناکۆکى خێزانى لەگەڵ هاوسەرەکەی، ئەو کارەى کردووە و بەمەبەستى گرتنەبەرى ڕێوشوێنى یاسایی بەرامبەری دۆسیەکەی ڕاوەنەی دادگاى تایبەتمەند کراوە.
