ئەمڕۆ دووشەممە بەشێک لە سێ یەکەمەکانی زانکۆ و پەیمانگاکانی هەرێمی کوردستان بەمەبەستی گەیاندنی داواکاری بۆ دامەزراندنیان لەبەردەم بینای ئەنجومەنی وەزیران لە شاری هەولێر گردبوونەوە.
گردبوونەوەی یەکەمەکان و بەرزکردنەوەی داواکاری بەمەبەستی دامەزراندنیان لەکاتێکدایە، بەگوێرەی یاسا پێویستە بەبێ هیچ مەرجێک دابمەزرێن. یەکێکە لە بەشداربوانی گردبوونەوەکە بۆ تۆڕی میدیایی خەڵک دوا و باسی لەوەکرد ئەوان ئەوان ماوەی پێنج ساڵە دانەمەزراون و لەچاوەڕوانی دامەزراندان، وتیشی چەندینجار بەڵێنی دامەزراندنیان پێدراوە، چونکە ئەمە یەکەمجار نییە ئەوان گرد دەبنەوە و داوای مافی یاسایی خۆیان دەکان.
بەشێکی دیکە لە دەرچووە یەکەمەکان ئاماژەبەوەدەکەن، حکومەت ئەوانی پشتگوێ خستووە و تواناکانیانی لەکارخستووە و لایەنی زانست و گرنگیدان بە یەکەمەکان بەرەو هەڵدێرچووە و تەنها گرنگی بەلایەنی سەربازی دەدەرێت و لایەنی زانست و پەروەردە و پێگەیاندن پشتگوێ خراوە.
دەرچووە یەکەمەکان داوادەکەن هاوشێوەی ناوچەکانی دیکە و پارێزگاکانی دیکەی عێراق دابمەزرێن و مافەکانیان پێ بدرێت و دامەزراندنیان وەک بەشێک لە پێداویستی زانکۆ و پەیمانگاکان دەزانن.
ئەوەش لەکاتێکدایە ساڵێک لەمەوبەر حکومەت بەڵێنی دامەزراندنی بە یەکەمەکانی زانکۆو پەیمانگاکان داوە، بەڵام تائێستا بەڵێنەکەی جێبەجێ نەکردووە و دەرچووە یەکەمەکانیش ئاماژە بەوەدەکەن ئەوان لە داواکاری مافی ڕەوای خۆیان بۆ دامەزراندن بەردەوام دەبن و هەتا ئێستا ٣٠ جار گردبوونەتەوە و خۆپیشاندانیان بۆ ئەو مەبەستە ئەنجامداوە.
