سەرۆکایەتی شارەوانی سلێمانی بڵاویکردەوە، ئەمڕۆ هاتوچۆی گۆڕەپانی بەردەرکی سەرا گۆڕانی بەسەردا دێت، بەهۆی ئەنجامدانی فیستیڤاڵی هاوینەی سلێمانی.
سەرۆکایەتی شارەوانی سلێمانی ئاگاداری هاوڵاتیان و شۆفێران دەکاتەوە و ڕایگەیاند، بە مەبەستی سازدانی (فیستیڤاڵی هاوینەی سلێمانی) لەبەر دەرکی سەرا، پاش نیوەڕۆی ئەمڕۆ لە کاتژمێر ٢ هەتا کاتژمێر ١١ی شەو هاتووچۆی ئۆتۆمبێل لە گۆڕەپانەكە بەربەست دەکرێت.
فیستیڤاڵی هاوینەی سلێمانی لە کاتژمێر ٧ی ئێوارە دەست پێدەکات و هاتوچۆ بەم شێوەی لێدێت: شەقامی پیرەمێرد تەنها بە ئاڕاستەی شەقامی گۆران (ئۆرزدی) كراوە دەبێت و شەقامی سابونکەران تەنها بە ئاڕاستەی شەقامی كاوه كراوه دەبێت بە ڕووی شۆفێراندا.
