نەخۆشی سکچوون و ڕشانەوە بەرۆکی هاووڵاتیانی شاری سلێمانی و بەشێك لە شار و شارۆچكەكانی دیكەی هەرێمی كوردستانی گرتۆتەوە، ڕۆژانە ژمارەیەکی بەرچاو لە هاووڵاتیان سەردانی نەخۆشخانە و دەرمانخانەکان دەکەن، تەندروستیش هۆشداری “ئەگەری كۆلێرا” دەدات و داوا لە هاووڵاتیان دەكات، سەوزە و ئاوی پیس و ماستاو و خواردنی دەرەوە بەكارنەهێنن.
لەگەڵ هاتنی وەزری هاوین وبەرزبوونەوەی پلەکانی گەرمادا چەندین نەخۆشی بڵاودەبنەوە، لە ماوەی ئەم هەفتەیەدا ژمارەیەكی زۆری هاووڵاتیان سەردانی نەخۆشخانەی شاریان کردووە، کە تووشی سکچوون و ڕشانەوە بوون، هەندێکیشیان بەوهۆیەوە دووچاری وشکبوونەوە بوونەتەوە و چارەسەریان بۆ دەكرێت و چەند نموونەیەكی پشكنینەكانیش ڕەوانەی تاقیگەی ناوەندیی لە بەغدا كراون بۆ دڵنیابوون لەوەی بزانن “كۆلێرا”یە یان تەنها سكچوون و ڕشانەوەیەكی ئاسایی.
د. ڕزگار عەلی، بەڕێوەبەری خۆپاراستنی تەندروستی سلێمانی ڕایگەیاندووە، ئەوەی ئێستا هەیە سكچوونێكی قورسە بڵاوبۆتەوە و گومان دەكەین كۆلێرا بێت و بۆ پشتڕاستكردنەوەش چەند نموونەیەكمان لە پشكنینەكان ناردووە بۆ تاقیگەی ناوەندی لە بەغدا و لەم چەند ڕۆژەدا ئەنجامەكانی دەگەڕێتەوە.
ئاشكراشی كرد، لە سەرەتای ئەمساڵەوە تا ئێستا ژمارەی ئەو كەسانەی بەهۆی تووشبوون بە سكچوون و ڕشانەوە داخڵی نەخۆشخانە كراون 5 هەزار كەسی تێپەڕاندووە.
ڕاشیگەیاند، پەتای سكچوون ڕوو لە زیادبوونە و هۆكارەكەشی ئەوەیە، كە لە وەرزی گەرمادا میكرۆب زیاتر بڵاودەبێتەوە و گەشەدەكات، هەروەها كەمی ئاوی خواردنەوە، كە یەكێك لە كێشەكانی دیكەش ئەوەیە، كە هەموو پاشەڕۆی بەشێكی ئێران و ناوچەی پشدەر دەڕژێتە ناو دەریاچەی دوكان و هەموو پاشەڕۆی سلێمانیش دەچێتە ناوچەی تانجەرۆ و زێرابەكان داپۆشراو نین.
سەبارەت بە خۆپاراستن وتی، “هۆكاری سەرەكی سكچوون ئاوی پیسە، بەڵام ئەو ئاوەی لە بەلوعەی تۆڕی سەرەكی ئاو هەیە لەگەڵ ئاوی بتڵكراو ئەوە لەژێر كۆنتڕۆڵی بەڕێوەبەرایەتی ئاو و بەڕێوەبەرایەتی تەندروستیدایە و خاوێنن، بەڵام ئەو ئاوەی دەیكڕن بە تانكەر بیكوڵێنن ئەوجا بیخۆنەوە”.
لای خۆشیەوە، بەڕێوەبەرایەتی گشتی تەندروستی سلێمانی لە ڕاگەیەنراوێكدا هۆشداری بە هاووڵاتیان دەكات بۆ خۆپارێزی لە “كۆلێرا” و ڕایدەگەیەنێت، حاڵەتەکانی سکچوون و ڕشانەوە بەشێوەیەکی بەرچاو زیادی کردووە و گومانی بڵاوبونەوەی کۆلێرای لێ دەکرێت سەرجەم تیمەکانی بەڕێوەبەرایەتیمان لەئیستادا پشکنین و بەدواداچوون بۆ حاڵەتەکان دەکەن .
دەشڵێت: “داوا لە هازوڵاتیان دەکەین لەئیستادا خۆیان بەدوور بگرن لە بەکارهێنانی ئەو ئاوەی لە سەرچاوەکەی دڵنیا نین و تەنها ئەو ئاوەی لەلایەن بەڕێوەبەرایەتی ئاوی سلێمانی دابین دەکرێت و ئاوی بتڵ کراوەکان، کە لە ژێرچاودێری تیمەکانی تەندروستیدا کاردەکەن بەکاربهێنن، هاوکات بڕیاردرا بە قەدەغەکردنی هەموو جۆرە سەوزە و ماستاو لە چێشتخانە و خواردنگەکان و شوێنە گشتیەکان تەنیا ڕێگە دەدرێت بە بەکەرهێنانی ماستاوی لەقتوونراو”.
بەڕێوەبەرایەتی گشتی تەندروستی سلێمانی داوا لە هاووڵاتیان دەکات، “پابەندی ڕێنمایە خۆپارێزیەکان بن و دڵنیان دەکەینەوە لەوەی هەموو ئامادەکارییەکی تەواوی کردووە بۆ هەر ئەگەرێك لەزیادبوونی حاڵەتەکان”.
