پۆلیسی دارستان و ژینگەی پارێزگای سلێمانی ڕایگەیاند ئەو ئاگرەی لە سنووری قەزای دوکان کەوتبووەوە، کۆنترۆڵ کرا.
ئەمڕۆ پێنجشەممە، پۆلیسی دارستان و ژینگەی پارێزگای سلێمانی بڵاویکردەوە، لە شاخی سارا کە دەکەوێتە سنوری قەزای دوکانەوە ئاگرێکی بەرفراوان کەوتەوە.
ڕوونیشێکردەوە کە سەرباری ڕەشەبا و سەختی شاخەکە و هەبوونی مین لەبەشێکی ئەو ناوچەیە، بەڵام تیمەکان توانییان بە هاوکاری بەشێک لە دانیشتووانی گەڕەکی سارا و گوندی قەمچووغە دوای نزیکەی سێ کاتژمێر ئاگرەکە کۆنتڕۆڵ بکەن.
ئەوەشیخستەڕوو کە نزیکەی پێنج دۆنم زەوی لە پووش و پاوان و داری سروشتی بە هۆی ئاگرەکەوە سووتان.
پۆلیسی دارستان ڕاشیگەیاند، هۆکاری ئاگرەکە نەزانراوە و لێکۆڵینەوە لەو بارەیەوە بەردەوامە.
