وەزیری تەندروستی عێراق ڕایدەگەیەنێت، بەرهەمهێنانی دەرمان لە عێراق بەشێوەی پلەبەندی ڕووی لە زیادبون کردووە و لەنێویشیاندا دەرمانی دژە شێرپەنجە هەیە.
ساڵح حەسناوی، وەزیری تەندروستی عێراق ڕایگەیاند، بەرهەمهێنانی دەرمان یەكێكە لە گرنگترین بەرنامەی کارەکانی حكومەت لەڕێی خستنەكاری پیشەسازیی نیشتمانی و سەرلەنوێ گەڕاندنەوەی دەستەواژەی (دروستكراوە لە عێراق- صنع في العراق).
وتیشی، “سیستمی بەرهەمهێنان هەریەك لە دەرمان، پێداویستی پزیشكی و كەلوپەلی پزیشكی لەخۆدەگرێت”.
“بەرهەمهێنانی دەرمان لە عێراق بە پلەبەندی زیاددەكات، هەنگاومان ناوە بۆ بەرهەمێنانی دەرمانی گرنگ لەوانە دەرمانی شێرپەنجە و ڕزگاركەری ژیان” .
ئاماژەی بەوەشكرد، ئەمە هەلێكی گەورەیە كە بەخشراوە بە كەرتی تایبەت لە سایەی حكومەتی ئێستادا.
هاوکات وەزیری تەندروستی باسی لەوەکرد كارگەیەك هەیە بۆ بەرهەمهێنانی پێداویستی پزیشكی، بەمنزیكانە و بۆیەكەمجار دەزووی نەشتەرگەری بەرهەمدەهێنرێت. هەروەها دوو كارگە هەن تایبەت بە دروستكردنی دەرزی و سرنج و یەكێكیان بەرهەمهێنانی دەستپێكردووە.
