سەرۆكی یەكێتیی نیشتمانیی كوردستان ڕایدەگەیەنێت، هەوڵەكانی یەكێتی لەپێناو بەڕێوەچوونی هەڵبژاردنێكی بێگەردە لە وادەی خۆیدا و دەشڵێت: “چیتر هاووڵاتییان لە دڵەڕاوكێی بەدەستهێنانی مووچەكانیان نەبن”.
بافڵ جەلال تاڵەبانی، سەرۆكی یەكێتیی نیشتمانیی كوردستان لە ماڵی مام لە بەغدا پێشوازی لە ئەلینا ڕۆمانۆسكی، باڵیۆزی ئەمریكا لە عیراق كرد و لەدیدارێكدا دۆخی گشتیی وڵات و بەردەوامیی گفتوگۆكان بۆ زاڵبوون بەسەر كێشەكان و تێپەڕاندنی بەربەستەكان گفتوگۆیان لەبارەوەكرا.
بەپێی ڕاگەیەنراوێكی نووسینگەی سەرۆكی یەكێتی، بافڵ جەلال تاڵەبانی ئاماژەی بە پرسی هەڵبژاردن، كێشەكانی نێوان هەولێر و بەغدا و ناردنی شایستەداراییەكانی هەرێم كرد و ڕایگەیاند، هەوڵەكانی یەكێتی لەپێناو بەڕێوەچوونی هەڵبژاردنێكی بێگەردە لە وادەی خۆیدا، دەشمانەوێت هەڵبژاردن هۆكارێك بێت بۆ نزیكبوونەوە و گەشەپێدانی دیموكراسی نەوەك ترازان.
وتیشی، “نابێت خەڵكەكەمان بكرێنە قوربانیی ململانێ سیاسییەكان و دەبێت دەستوور بنەمای چارەسەركردنی كێشەكان بێت”.
جەختیشی كردۆتەوە، هەوڵەكانیشمان لەو پێناوەدا بەردەوام دەبێت تاوەكو چارەسەرێكی یەكجارەكی و ئەرێنی دەدۆزینەوە و چیتر هاووڵاتییان لە دڵەڕاوكێی بەدەستهێنانی مووچەكانیان نەبن.
