بەهۆی تەقینەوەی ماددەی کلۆرەوە لە یەکێک لە مەلەوانگەکانی شاری کەلار، کە ٣٠ ژنی تێدا بووە، چوار ژن برینداربوون و ڕەوانەی نەخۆشخانەی فریاکەوتن کراون. جێگری بەڕێوەبەری فریاکەوتنی کەلار دەڵێت، لەژێر ئۆکسجیندان و دۆخی تەندروستییان جێگیرە و مەترسی لەسەر ژیانیان نییە.
ڕزگار لەتیف، جێگری بەڕێوەبەری نەخۆشخانەی فریاکەوتنی شەهید هەژار لە کەلار، ڕایگەیاند “کلۆر لە یەکێک لە مەلەوانگەکانی کەلار تەقیوەتەوە و لەکاتی تەقینەوەکەدا نزیکەی ٣٠ ژنی تێدابووە، لەنێویاندا ٤ کەسیان تووشی هەناسەتەنگی بوون و ئێستا لەژێر ئۆکسجیندان لە نەخۆشخانەکەمان”.
عەلی جەمال قدووری، بەڕێوەبەری راگەیاندنی پۆلیسی گەرمیان دەڵێت، ئاگادار نەکراونەتەوە و دۆسێیەکە زیاتر پەیوەندی بە بەرگریی شارستانییەوە هەیە. وتیشی، “دۆسێکە بێتە بەردەستمان، لێکۆڵینەوەی تێدا دەکەین و زانیاری لەسەر بڵاودەکەینەوە”.
هاوکات ئیبراهیم محەممەد، بەڕێوەبەری بەرگریی شارستانی کەلار وتی، تاوەکو ئێستا لە ڕووداوی لەو شێوەیە ئاگادار نەکراونەتەوە بۆئەوەی بەدواداچوونی بۆ بکەن.
