وەزارەتی شارەوانی و گەشتوگوزار بڵاویکردەوە، گوژمەی ٢٠٠ ملیۆن دینار بۆ نۆژەنكردنەوەی چەند شەقامێكی شاری هەولێر خەرج دەكرێت.
وەزارەتی شارەوانی و گەشتوگوزار ڕایگەیاند، بەپێی فەرمانێكی وەزاری، ڕەزامەندی نیشاندا لەسەر خەرجكردنی گوژمەیەك بە بڕی ٢٠٠ ملیۆن دینار بۆ جێبەجێكردنی پرۆژەی نۆژەنكردنەوە و كۆنكرێتكردنی چەند شەقامێك لە شاری هەولێر.
لە بڵاوکراوەکەدا هاتووە، ئەو گوژمەیە لەسەر ڕێژەی ٪١٥ی داهاتی شارەوانییە لە سنووری سەرۆكایەتیی شارەوانی هەولێر و لەسەر پلانی ساڵی ٢٠٢٣ فەرمانی وەزاری بۆ خەرجكردنی دەرچووە بەمەبەستی جێبەجێكردنی پرۆژەی نۆژەنكردنەوە و كۆنكرێتكردنی چەند شەقامێك لە سنووری بەڕێوەبەرایەتیی شارەوانیی سێ، سەر بە سەرۆكایەتیی شارەوانیی هەولێر.
لە ئێستادا ژمارەیەك پرۆژەی خزمەتگوزاریی جۆراوجۆر لە سنووری سەرۆكایەتیی شارەوانیی هەولێر لە قۆناغی جێبەجێكردندان بۆ زیاتر خزمەتكردن و گەیاندنی خزمەتگوزاری بە گەڕەك و شوێنە گشتییەكانی شاری هەولێر.
