ئەمڕۆ یەک شەممە 13ی ئاب، نەخۆشخانەی ڤێتێرنەری لە دیالە تۆمارکردنی یەکەم حاڵەتی تووشبوونی بە نەخۆشی “هاری سەگ” ڕاگەیاند.
بڵاوبوونەوەی سەگی بێسەرپەرشت “سەگی بەرەڵا” لە چەند ناوچەیەکی شارەكانی عێراق و تەنانەت هەرێمی كوردستانیش سەرەڕای ئەوەی مەترسی بۆ سەر گیانی هاووڵاتیان دروست كردووە، نیگەرانییەکانی لە گەڕانەوەی نەخۆشی هاری زیاد كردووە، بەتایبەتی بەهۆی هێرشی بەردەوامیان بۆ سەر منداڵان و ژنان.
د. ئیبتیسام محەمەد، بەڕێوەبەری نەخۆشخانەی ڤێتێرنەری دیالە بۆ ئاژانسی (المعلومە) ڕایگەیاند، ژنێکی تەمەن 20 ساڵان خەڵکی قەتەعە لە باکووری قەزای مقدادیە (٤٠ کم باکووری ڕۆژهەڵاتی بەعقوبە) تووشی نەخۆشی هاری سەگ بووە و بۆ چارەسەرکردن گواسترایەوە بۆ نەخۆشخانەی فێرکاری بەعقوبە.
ڕاشیگەیاندووە، ئەوە یەکەم حاڵەتە لە چەندین مانگی ڕابردوودا تۆماركرابێت و دەشڵێت: “ژنە بریندارەکە لەلایەن سەگێکەوە هێرشی کراوەتە سەر و لە ئەنجامدا بریندار بووە و سەردانی هیچ دامەزراوەیەکی پزیشکی نەکردووە، ئەمەش بووە هۆی پشتڕاستکردنەوەی تووشبوونەکە و لە ئێستادا لەژێر چاودێریدایە”.
ئەو پزیشكە هۆشداری بە هاووڵاتیان دەدات و ڕێنماییان دەكات، “پێویستە هاووڵاتیان بەئاگا و وریابن بەرامبەر بە سەگی بێسەرپەرشت و بەپێی چوارچێوەی خۆپارێزی و چارەسەر مامەڵە لەگەڵ هەر حاڵەتێکدا بکەن بۆ ئەوەی تووشی نەخۆشی هاری نەبن”.
لە ماوەی ڕابردووشدا چەندین حاڵەتی پەلاماردانی سەگی بەرەڵا لە شارەكانی هەرێم تۆماركراوە و هاووڵاتیان داوای شارەسەركردنی ئەو دۆخەیان كردووە و لەلایەن شارەوانییەوە شوێنی تایبەت بە كۆكردنەوەیان دروست كراوە، بەڵام چارەسەری دۆخەكەی نەكردووە و ئێستاش بە دەیان سەگ لە كووچە و كۆڵانەكاندا بڵاوبوونەتەوە و مەترسین بۆ سەر گیانی هاووڵاتیان و ڕێكخراوە ئاژەڵدۆستەكانیش ڕێگا نادەن لەڕێگەی پزیشكییەوە “نەزۆك” بكرێن تاوەكو لەوەزیاتر تەشەنە نەكەن.
