وەزیری کشتوکاڵ ڕایگەیاند، لقەکانی ماکدۆناڵدزی ئەمریکی لە وڵاتانی کەنداو داوای بەرهەمی پەتاتەی کوردستان دەکەن.
ئەمڕۆ چوارشەممە، بێگەرد تاڵەبانی وەزیری کشتوکاڵ ڕایگەیاند، لەچوارچێوەی هەوڵە بەردەوامەکانی وەزارەتی کشتوکاڵ و سەرچاوەکانی ئاو، بۆ دابینکردنی ئاسایشی خۆراک و بەبازاڕکردن و هەناردەکردنی بەرهەمەکانی جوتیاران بۆ بازاڕەکانی دەرەوەی هەرێمی کوردستان، لە ئیمارات پێشوازییەکی گەرم لە پەتاتەی جوتیارانی کێڵگەکانی پارێزگای هەولێر کرا و (300) تۆن پەتاتە لە هەشت کۆنتێنەردا ڕەوانەی عەلوەی ئیمارات کرا .
ڕوونیشیکردەوە کە لەئێستادا ئامادەکاری دەکرێ بۆ هەناردەکردنی سەدان تۆن پەتاتە بۆ وڵاتانی کەنداو و ئوردن لەسەر داخوازی لقەکانی ماکدۆناڵدز بۆ بەپیشەسازی کردنی پەتاتە و دروستکردنی چپس و فینگەر.
ڕاشیگەیاند، بەهۆی پاڵپشتیەکانی جوتیاران لە پێشخستنی شێوازی بەرهەمهێنانی جۆرەکانی پەتاتە، ئەمساڵ پێشبینیکراوە کە هەرێمی کوردستان بگاتە لوتکەی بەرهەمهێنان و زیاتر لە (600) هەزار تۆن پەتاتەی خواردن و (150) هەزار تۆن پەتاتەی پیشەسازی بەرهەمبێت.
بێگەرد تاڵەبنای وتیشی: لەسەر ئاستی ناوخۆی هەرێمی کوردستان بەهۆی پێگەیشتنی وەرزی پەتاتەی خۆماڵی، هاوردەکردنی پەتاتە لە دەرەوە قەدەغەکراوە، هەروەها وەزارەتی کشتوکاڵ و سەرچاوەکانی ئاو، لێکتێگەیشتننامەی هەیە لەگەڵ حەوت کارگە و کۆمپانیای بەرهەمهێنانی پەتاتەی پیشەسازی بۆ ئەوەی ساڵانە ڕاستەوخۆ بەرهەمی پەتاتەی جوتیاران وەربگرنەوە.
