هاوکات لەگەڵ بەرزبوونەوەی خواست لەسەر بەکارهێنانی کارەبا و بەرزبوونەوەی بەرچاوی پلەکانی گەرما، وەزارەتی کارەبای عێراق پەککەوتنی کارەبای نیشتمانیی ڕاگەیاند.
ڕۆژی شەممە، وەزارەتی کارەبای عێراق بڵاویکردەوە بەهۆی ئاگرکەوتنەوە لە وێستگەی ئەلبەکر لە پارێزگای بەسرە و کردەوەیەکی تێکدەرانە لە هێڵی سەڵاحەدین – حەدیسە، خزمەتگوزاری کارەبای نیشتمانی پەکی کەوت.
زیاد فازڵ وەزیری کارەبای عێراق، ڕێنماییدا بەپەلە لیژنەی لێکۆڵینەوەی پێکبهێنرێت بۆ بەدواداچوون و ڕوونکردنەوەی هۆکارەکانی ئەو ئاگرەی کە لە وێستگەی لاوەکی ئەلبەکر ڕوویداوە.
ئاگرەکە بووە هۆی پچڕانی هێڵەکانی گواستنەوەی کارەبا لە نێوان ناوچەکانی ناوەڕاست و باشووری عێراق.
بەپێی ڕاگەیەندراوێکی وەزارەتی کارەبا لیژنەیەکی دیکە پێکهێنراوە بۆ لێکۆڵینەوە لەو کارە تێکدەرانەی بەرامبەر تاوەرەکان و هێڵەکانی گواستنەوەی کارەبای سەڵاحەدین ئەنجامدران.
ئامادەکردنی: ئیلهام سەردار
خوێندکاری مەشقکار لە پەیمانگەی تەکنیکی سلێمانی
