وەزارەتی تەندروستی عێراق وەڵامی ئاژانسی بلومێرگی ئەمریکی دەداتەوە لەبارەی ژەھراویبوونی دەرمانێکی تایبەت بە چارەسەری منداڵان و دەڵێت ئەو دەرمانە لای ئەوان تۆمارنەکراوە.
سەیف بەدر، وتەبێژی وەزارەتی تەندروستی عێراق رایگەیاند، دەرمانی “کۆڵد ئاوت” کە ئاژانسی بلومێرگ باسی لێوەکردووە و بۆ چارەسەری منداڵان بەکاردەهێنرێت لە وەزارەتی تەندروستی تۆمارنەکراوە و مامەڵەکردن پێوەی نایاسایییە.
ئاماژەی بەوەشکردووە، بابەتی دەرمانی کۆڵد ئاوت، کە دەرمانێکە بۆ نەخۆشی سەرمابوونی منداڵ بەکاردەھێندرێت، بابەتێکی نوێ نییە و پێشتر وەزارەتی تەندروستی بەدواداچوونی بۆ کردووە.
دەشڵێت:”تیمەکانی چاودێری وەزارەتی تەندروستی بەردەوامن لە بەدواداچوون بۆ ئەو دەرمانە و ھاوشێوەکانی و بە سزاگەیاندنی لایەنی سەرپێچیکاری پشت ھاوردەکردنی ئەو دەرمانانە”.
