بڕیارە هەفتەی داهاتوو حكومەتی عێراق بڕی 906 ملیار دینار رەوانەی هەرێمی كوردستان بكات بەمەبەستی دابەشكردنی موچەی مانگی (حوزەیران/6)ی فەرمانبەرانی هەرێم.
بەگوێرەی رێكکەوتنی هەولێر و بەغدا، حكومەتی عێراق هەفتەی داهاتوو 906 ملیار دینار بۆ موچەی فەرمانبەران دەنێرێت، شاندی هەرێمی كوردستانیش، داوای سەرجەم پشكی دیاریکراو لە بودجەی عێراق دەکات كە بڕەكەی 10 ترلیۆن و 867 ملیار دینارە بۆ موچەی فەرمابنەران و خانەنشینان و پێشمەرگە.
هەر بەگوێرەی زانیاریەكان، لەچوارچێوەی دانوستانی نێوان شاندی حكومەتی هەرێم و بەرپرسانی باڵای عێراق بڕیاردراوە هەردولا پابەندی ئەو رێكەوتنە بن و مانگانە لەوادەیەكی دیاریكراودا پشكی هەرێم بنێرێت.
بەرەبەیانی ئەمڕۆ پێنجشەممە شاندی حکومەتی هەرێمی کوردستان رێککەوتنی لەگەڵ شاندی حکومەتی عێراق راگەیاند، کە بەپێی ناوەڕۆکی رێککەوتنەکە چەند پابەندیەک بۆ هەرێم دیاریکراوە و لە بەرامبەردا پشکی کوردستان رەوانە دەکرێت،
رێککەوتنەکەی هەرێم و بەغدا لە پێنج خاڵ پێکهاتوە کە تیایدا دەڵێت، “لیژنەیەکی هاوبەش بۆ لێکۆڵینەوە لە داهاتی نانەوتی پێکدەهێنرێت و وەزارەتی دارایی عێراق 50%ی داهاتی دەروازە سنورییەکان دەداتەوە هەرێمی کوردستان”.
