بە هۆی حاڵەتێکی خۆکوشتنەوە، فڕۆکەیەکی هێڵی ئاسمانی تورکیا بە ناچاری لە جەزائیر نیشتەوە.
میدیای فەرمی تورکیا بڵاویکردەوە، ڕۆژی سێشەممە فڕۆکەیەکی هێڵی ئاسمانی تورکیا کە لە گەشتێکی نێوان ئیستانبوڵ-مەراکیشدا بوو، بە ناچاری لە جەزائیر نیشتەوە.
ڕوونیشیکردەوە کە لە کاتی گەشتەکەدا، سەرنشینێکی بیانی چووەتە تەوالێتی فڕۆکەکەوە، بەڵام بە هۆی زۆر مانەوەی، گومان لای تیمی فڕۆکەکە دروست بووە و دوای کردنەوەی دەرگاکەی، سەرنشینەکەیان بە بیهۆشی بینیوەتەوە.
ئەوەشخراوەتەڕوو، هەرچەندە تیمی فڕۆکەکە و پزیشکێك کە لە نێو سەرنشینەکاندا بووە، چارەسەری سەرەتاییان بۆ کردووە، بەڵام باری تەندروستی تێکچووە و بە هۆیەوە فڕۆکەکە ناچاربووە لە جەزائیر بنیشێتەوە.
دوای نیشتنەوەی فڕۆکەکەش لە جەزائیر، تیمێکی پزیشکی چوون بە هانای سەرنشینەکەوە، بەڵام گیانی دەستداوە و دواتر بۆیان دەرکەوتووە کە مردنەکەی ئاسایی نەبووە و خۆی کوشتووە.
