سەرۆکی یەکێتی لە میانی کۆبوونەوەی لەگەڵ قەیس خەزعەلی ڕایگەیاند، بەدەستهێنانی مافە دەستوورییەكانی هەرێم و خزمەتكردنی خەڵكەكەمان ئەركی لەپێشینەی ئێمەیە.
ئەمڕۆ سێشەممە، بافڵ جەلال تاڵەبانی، سەرۆکی یەکێتیی نیشتمانیی کوردستان و قەیس خەزعەلی، ئەمینداری گشتیی بزووتنەوەی عەسائیب ئەھلی حەق لە بەغدا کۆبوونەوە.
بە پێی ڕاگەیەندراوێکی نووسینگەی تاڵەبانی، لە کۆبوونەوەکەدا دوایین پێشهات و گۆڕانكارییە سیاسییەكان تاوتوێكران و جەخت لە بەهێزتركردنی دامەزراوە یاسایی و دەستوورییەكان كرایەوە بەشێوەیەك لە ئاست پێداویستییەكانی دۆخەكە و داخوازییەكانی هاوڵاتییان بێت.
لەدرێژەی كۆبوونەوەكەدا پتەوكردنی پەیوەندییەكانی نێوان هەردوولا و فراوانكردنی هەماهەنگییەكان لەپێناو دروستكردنی كۆدەنگیی نیشتمانیی سەبارەت بە پرسە نیشتمانییەكان و تێپەڕاندنی بەربەستەكانی بەردەم پرۆسەی چاكسازی جەختیلێكرایەوە.
لەبارەی كێشەكانی نێوان هەرێم و بەغدا و هەوڵەكانی یەكێتی بۆ تێپەڕاندنی دۆخەكە بافڵ تاڵەبانی وتی، بەدەستهێنانی مافە دەستوورییەكانی هەرێم و خزمەتكردنی خەڵكەكەمان ئەركی لەپێشینەی ئێمەیە و هەوڵەكانیشمان لەپێناو بەدیهێنانی ئەو ئامانجە باڵایە بەردەوام دەبێت.
