عێراق ئیدانەی سووتاندنی کۆپییەکی قورئانی پيرۆز لە بەردەم باڵیۆزخانەی وڵاتەکەی لە کۆبنهاگن دەكات و ستافی دیبلۆماسی نوێنەرایەتی دانیمارک لە بەغدا دوای ناڕەزایەتییەکان عێراقیان بەجێهێشت.
ئەمڕۆ دوو شەممە دوو کەس لە بەردەم باڵیۆزخانەی عێراق لە شاری کۆبنهاگن-ی پایتەختی دانیمارک قورئانیان سووتاند.
ئاژانسی هەواڵی (العراقیە) لە زاری وەزارەتی دەرەوە بڵاویکردەوە، داوا لە دەسەڵاتدارانی وڵاتانی یەکێتی ئەوروپا دەکەن “بەخێرایی بەناو ئازادیی ڕادەربڕین و مافی خۆپیشانداندا بچنەوە”.
وتەبێژی وەزارەتی دەرەوەی عێراق ڕایگەیاندووە، “ستافی دیبلۆماسی نوێنەرایەتی دانیمارک لە بەغدا دوو ڕۆژ لەمەوبەر خاکی عێراقیان بەجێهێشت”.
ئێران و عێراق شایەتحاڵی ناڕەزایەتییەکان بوون دوای ئەوەی دەسەڵاتدارانی دانیمارک و سوید لەژێر ڕێساکانی پاراستنی مافی ئازادی ڕادەربڕین ڕێگەیان بە سووتاندنی نوسخەی قورئان دا. ڕۆژی پێنج شەممە خۆپیشاندەران لە عێراق ئاگریان لە باڵیۆزخانەی سوید لە بەغدا بەردا.
