ئەمڕۆ یەک شەممە، دادگای باڵای فیدڕاڵی، کە باڵاترین دەسەڵاتی دادوەرییە لە عێراق، بڕیاری نادەستووری بوونی دەستەواژەیەکی دەرکرد، کە لە بڕیارێكی ئەنجوومەنی فەرماندەیی شۆڕشی هەڵوەشاوەی ڕژێمی بەعسی ڕووخاودا هاتووە و دەڵێت: “پێشێلکردنی بنەما نەگۆڕەکانی ئیسلامە”.
ئەنجوومەنی دادوەری عێراق لە بەیاننامەیەكدا ئاماژەی بەوەكردووە، “دادگای باڵای فیدراڵی ئەمڕۆ یەک شەممە 16- 7- 2023، تاوتوێی دۆسیەی ژمارە 95 / فیدراڵی/ 2023ی کرد، بڕیاری خۆی دەرکرد بەوەی، کە دەستەواژەی (خاوەندارێتی ئەو خانوو یان شوقەیەی شەهید پێش شەهیدبوونی بەناوی ژن و منداڵەکانییەوە دەکات) كە لە بڕگەی (2/ أ)ی بڕیارنامەی ئەنجوومەنی فەرماندەیی شۆڕشی هەڵوەشاوەی ژمارە (1750)ی ساڵی 1980ی هەموارکراودا هاتووە، نادەستوویە.
ڕاشیگەیاندووە، “ئەم بڕیارە جێبەجێ دەکرێت، لە بەرواری دەرچوونی لە 16- 7- 2023، وەک بڕیارێکی کۆتایی و پابەندکەر بۆ هەموو دەسەڵاتەکان.”
