وڵاتانی ئەوروپا لە ئامادەكاریدان بۆ ڕووبەڕووبونەوەی بەرزترین پلەكانی گەرما بەدرێژایی مێژوو، ئەوەش لەکاتێکدایە ماوەی چەند ڕۆژێكە گەرمایەکی بەهێز کەپێشتر هاوشێوەی کەم بووە ڕووی لە حەوت وڵاتی عەرەبی كردووە.
چەند وڵات و ناوچەیەك لە ئەوروپا هەفتەی داهاتوو ڕووبەڕووی بەرزترین پلەکانی گەرما دەبنەوە، دوای ئەوەی شارەزایانی كەشناسی هۆشدارییاندا لەوەی بەرزترین پلەی گەرما دەگاتە ٤٨ پلەی سیلیزی، كە مەترسی بۆسەر ژیانی مرۆڤ و پەلەوەر و بەروبوومی كشتوكاڵی دروست دەکات.
كیشوەری ئەوروپا لە بەردەم شەپۆلێكی گەرمی توند دایە كە بە (سیربیرۆس) ناسێنراوە و بەواتای یەکێک لە “پاسەوانانی جەهەنەم” لە ئەفسانەكانی یۆناندا دێت.
بەرزبوونەوەی پلەكانی گەرما بووەهۆی ئاگركەوتنەوە لە دارستانەكانی كرواتیا، لەكاتێكدا گەشتیار و دانیشتووانی ناوخۆ هەوڵ بۆ گونجان لەگەڵ بەرزبوونەوەی پلەكانی گەرما دەدەن. بەگوێرەی رۆژنامەی دەیلی مەیلی بەریتانی لە كۆتایی هەفتەی داهاتوودا لە هەریەكە لە وڵاتانی ئیسپانیا، ئیتاڵیا، یۆنان و توركیا بەرزی پلەکانی گەرما ٤٥ پلەی سیلیزی تێدەپەڕێنێت.
