بە هۆی ئاگرکەوتنەوە لە چەند گوندێكی سنووری قەزای ماوەتی سلێمانی، سەدان دۆنم پوش و پاوان و پێنج دۆنم ڕەز و باخی هاووڵاتییان سووتان.
ئەمڕۆ دووشەممە، بەڕێوەبەرایەتی پۆلیسی دارستان و ژینگەی پارێزگای سلێمانی بڵاویکردەوە، بەشی پۆلیسی دارستانی ماوەت توانییان ئاگرێك کۆنترەۆك بکەن کە لە گوندی دەشتی تلێ کەوتبووەوە و هاووڵاتییەکیش بە تۆمەتی هۆکاری ئاگرەکە دەستگیرکرا.
ڕوونیشیکردەوە کە لە سنوری گوندی کونەماسی بەهۆکاری تەقینەوەیەکی نادیار ئاگرێك کەوتەوە، مەفرەزەیەك لە کارمەندانی بەشی پۆلیسی دارستانی ماوەت بە هاوکاری و هەماهەنگی لەگەڵ بنکەی پۆلیسی دارستانی گاپێڵۆن و ئاگرکوژێنەوەی ماوەت و سلێمانی و هەروەها دانیشتوانی گوندەکانی کونەماسی و وڵاغلو هەوڵیاندا ئاگرەکە کۆنترۆڵ بکەن، بەڵام بەهۆی تەقینەوەی مین لە ناوچەکەدا ڕووبەری ئاگرەکە فراوانتر بوو.
ئەوەشیخستەڕوو کە دوای ئەوەی ئاگرەکە گەیشتە سنوری گوندی وڵاغلو، توانرا کۆنتڕۆڵ بکرێت.
بەڕێوەبەرایەتی پۆلیسی دارستان و ژینگەی پارێزگای سلێمانی ڕاشیگەیاند، بە هۆی ئاگرەکەوە نزیکەی٣٥٠ دۆنم پوش و پاوان داری سروشتی، هەروەها پێنج دۆنم ڕەزو باخی هاووڵاتییان سووتان.
