وەزیری دەرەوەی عێراق داوای پتەوکردنی هاریکارییەکان نێوان عێراق و بەریتانیا دەکات لە بوارەکانی فێرکردن، تەندروستیی، بازرگانی، پیشەسازی و کشتوکاڵدا.
وەزیری دەرەوەی عێراق، فوئاد حوسێن و وەزیری دەرەوەی بەریتانیا، جەیمس کلێڤەرلی رێگاکانی پتەوترکردنی پەیوەندییە دووقۆڵییەکانی نێوان بەغدا و لەندەن-یان تاوتوێ کرد.
وەزارەتی دەرەوەی عێراق ڕایگەیاند فوئاد حوسێن لەچوارچێوەی سەردانەکەی بۆ لەندەن لەگەڵ جەیمس کلێڤەرلی کۆبووەوە.
راشیگەیاند لە کۆبوونەوەکەدا، پتەوترکردنی پەیوەندییە دووقۆڵییەکانی نێوان عێراق و بەریتانیا تاوتوێ کراوە و لەوبارەیەوە، فوئاد حوسێن دوای کرد کە ھاریکارییە ھاوبەشەکانی نێوان ھەردوو وڵات لە بوارەکانی فێرکردن، تەندروستیی، بازرگانی، پیشەسازی و کشتوکاڵدا پتەوتر بکرێن.
ھەروەھا باسی لەوە کرد کە عێراق رۆڵی گرنگ بۆ پتەوترکردنی سەقامگیریی ھەرێمیی و نزیککردنەوەی نێوان وڵاتانی ناوچەکە دەگێرێت، بەتایبەتیش لە نزیککردنەوەی نێوان سعوودیە و ئێران و راشیگەیاندووە کە عێراق ئامادەیە ھەوڵی زیاتر بدات بۆ کەمکردنەوەی گرژییەکان لە ناوچەکە.
لای خۆیەوە جەیمس کلێڤەرلی خۆشحاڵی خۆی نیشاندا سەبارەت بە ھەوڵەکانی حکوومەتی عیراق بۆ ئەنجامدانی چاکسازیی لە بواری ئابوورییدا و رایگەیاند کە بەریتانیا ئامادەیەوە لەوباریەوە پاڵپشتی پێشکەش بە حکوومەتی عێراق بکات.
