عەون زیاب وەزیری سامانە ئاوییەکانی عێراق ڕایگەیاند، بۆ چوارەم وەرزی لەسەریەک عێراق بە سەختترین قۆناغی وشکەساڵیدا تێدەپەڕێ، ئەوەش بەهۆی کەمی بەردانەوەی ئاو و کاریگەرییەکانیان لەسەر ئاستی ئاوی ڕووبارەکانی دیجلە و فورات و یەدەگە ستراتیژییەکانی وڵات.
وتیشی، کەمی ئاو بووەهۆی ئەوەی حکومەت ڕێگری بکات لە چاندنی برنج و گەنمەشامی زەرد بۆ وەرزی ئێستا ، چونکە پێویستی بەبڕێکی زۆر ئاو هەیە.
جەختیشی لەوە کردەوە، وەزارەتی سامانە ئاوییەکان هەوڵ دەدات بۆ دەستەبەرکردنی ئاوی خواردنەوە و پێداویستییە ناوخۆیی و پیشەسازی و تەندروستی و ژینگەییەکان.
عەون دیاب ئەوەشی خستەڕوو، لێکتێگەیشتنی ئەرێنی لەگەڵ لایەنی تورکیا هەیە کە گرنگترینیان پلانی کارپێکردنی هاوینەیە بۆ زیادکردنی رێژەی بەردانەوەی ئاوی ڕووبارەکانی دیجلە و فورات لە ماوەی هاوینی ئێستادا بۆ بەنداو و خەزانەکانی ئاو، کە لەسەر بنەمای پلانی ئاوی وڵات ئامادە دەکرێت.
