کۆمسیۆنی باڵای سەربەخۆی هەڵبژاردنەکان کردنەوەی دەرگای تۆمارکردنی حزب و هاوپەیمانییەکانی لە هەڵبژاردنی ئەنجوومەنی پارێزگاکان لە 1 تا 30ی تەمموزی داهاتوو ڕاگەیاند.
دادوەر عەباس ئەلفەتلاوی، سەرۆکی بازنەی هەڵبژاردنەكانی كۆمسیۆن ڕایگەیاند، ئەنجوومەنی کۆمسیۆن هەوڵدەدات لە ئاست ئەو بەرپرسیارێتییە بێت، کە پێی سپێردراوە و بە بەرزترین ئاستی دادپەروەری و دەستپاکی و شەفافیەت پێیدا تێپەڕێت.
وتیشی، “دەستەی کۆمسیاران هەنگاوی یەکەم لەو بارەوە ڕادەگەیەنێت، بەو پێیەی بڕیار درا دەرگای ناو تۆمارکردن بۆ لایەنە سیاسییەکان و هاوپەیمانییەکان بکرێتەوە، کە خوازیاری بەشداریکردنن لە پڕۆسەی هەڵبژاردنی ئەنجوومەنی پارێزگاکان بۆ ساڵی 2023”.
سەرۆکی بازنەی هەڵبژاردنەكانی كۆمسیۆن داواشی لە سەرجەم لایەنە سیاسی و هاوپەیمانییەکان كرد، كە خوازیاری بەشداریکردنن لە هەڵبژارندا، لە وادەی دیاریکراودا داواکارییەکانیان پێشکەش بە بەشی کاروباری حزب و ڕێکخراوە سیاسییەکان بکەن بۆ تەواوکردنی ڕێکارەکانی بەشداریکردن لە هەڵبژاردنەکاندا.
