سەركردەیەكی هاوپەیمانی دەوڵەتی یاسا، كە لەلایەن نوری مالكییەوە سەرۆكایەتی دەكرێت، پێشبینی دەكات، هەرێمی کوردستان ڕازی نەبێت بە دەرکردنی یاسای نەوت و غاز، دەشڵێت: “حکومەتی فیدڕاڵی ڕووبەڕووی سەختییەکی زۆر دەبێتەوە لە دەرکردنی یاساکە، چونكە خزمەتی بەرژەوەندی کورد ناکات”.
عەباس مالکی، سەركردە لە هاوپەیمانی دەوڵەتی یاسا لە چاوپێکەوتنێکیدا لەگەڵ ئاژانسی (المعلومە) ڕایگەیاندووە، “یاسای نەوت و گاز ساڵانێکی زۆرە لەسەر مێزی گفتوگۆكان بووە، ئەگەر لە بەرژەوەندی کورددا بووایە، ئەوا لەو کاتەدا ڕازی دەبوون بە تێپەڕاندنی”.
ئاماژەی بەوەشکرد، “حکومەتی هەرێم پێی وایە یاسای نەوت و غاز خزمەت بە بەرژەوەندییەکانی ناکات، بۆیە پەكخرا و دواخرا بۆ ئەوەی پەسەندی نەکات و دەنگی لەسەر نەدرێت بۆ ئەوەی بە یاسایەکی جێبەجێکراو هەژمار نەکرێت، کە دەرهێنانی نەوت و غاز ڕێکدەخات بۆ هەناردەکردن و سوود وەرگرتن لە سامانی عێراق لە کوردستان”.
مالكی ڕوونیشیکردەوە، “هیچ گۆڕانکارییەکی نوێ لە گۆڕەپانی سیاسیدا نییە، کە پێویست بکات هەرێم ڕازی بێت بۆ دەرکردنی ئەم یاسایە، بەتایبەتی دوای وەهمیی سیاسی و پاڵنانی و ڕاکێشان لەکاتی پەسەندکردنی یاسای بودجە”.
ئەو سەركردەیەی هاوپەیمانی دەوڵەتی یاسا پێشبینی ئەوەش كرد، “بەشێكی گرنگی سەرکردایەتی کوردستان ڕازی نابێت بە دەرکردنی ئەم یاسایە، بۆیە حکومەتی فیدراڵی ڕووبەڕووی ئاستەنگی گەورە دەبێتەوە لە دەرکردنیدا”.
لیژنەی نەوت و گاز و سامانە سرووشتییەکان لە پەرلەمانی عێراق بەڵێنیان دابوو بە پەسەندکردنی یاسای نەوت و غاز، ناکۆکییەکانی نێوان حکومەتی فیدراڵی و حکومەتی هەرێم تێپەڕێنن، ئەمەش ئاماژەیە بۆ ئەوەی دەرکردنی ئەو یاسایە بەسە بۆ چارەسەرکردنی قەیرانەکانی نێوان هەردوولا.
یاسای نەوت و غاز لە یەکەم دانیشتنی پەرلەمانەوە، واتە ساڵی 2005، لە پەرلەمان وەستاوە و یەکێکە لەو خاڵە دیارانەی، کە ڕێککەوتنی پێشوەختەی لەسەر کراوە لەنێوان حکومەتەکانی بەغدا و هەولێر؛ بەڵام ڕووبەڕووی چەندین ئاستەنگ دەبێتەوە.
